Zëvendëskryeministri Niko Peleshi u takua dje me fermerë të qarkut Korçë, ku në qendër të takimit ishte nisma e qeverisë për formalizimin e sektorit bujqësor. Nisur nga fakti se Rajoni i Korçës është shumë i rëndësishëm për ekonominë pasi përbën fushën e dytë bujqësore më të madhe në Shqipëri, Peleshi përgëzoi fermerët e këtij qarku, të cilët i janë përgjigjur sipas tij pozitivisht nismës së qeverisë për formalizimin e aktivitetit bujqësor. “Na është dashur të përballojmë një kërkesë shumë të madh ditët e fundit, sepse përgjigja ndaj reformës tonë kundër informalitetit dhe për formalizimin e ekonomisë nga fermerët e Korçës të Fierit, por edhe gjithë Shqipërisë ka qenë shumë e madhe”, – tha ai. Ndërkaq, zv.kryeminsitri tha se pajisja me NIPT, nuk ngarkon me asnjë kosto shtesë fermerin, por e bën fermerin pjesë të sistemit formal të ekonomisë dhe rrit mundësitë e daljes lirshëm në treg. Po ashtu Peleshi ju përgjigj akuzave të opozitës lidhur me shitjen e prodhimeve duke pohuar: “Është për të ardhur keq kur spekulohet me shitjen e prodhimeve, ndërkohë që këtë vit, ne kemi shifrat këtu, pothuaj është dyfishuar eksporti i shumë prej prodhimeve tona, duke filluar nga molla, nga kumbulla që është shitur plotësisht. Eksportet janë dyfishuar, gjë që tregon se jemi në një vit të mirë”.
