Florenc Drizari
Kreu i PD-së: Qeveria, shkelje të paprecedentë të ligjit, Kushtetutës dhe konsensusit
Lulzim Basha drekë pune me përfaqësuesit e vendeve të BE-së, OSBE-së dhe USA
Dy ditë para protestave të paralajmëruara nga opozita në Tiranë, kryetari i Partisë Demokratike Lulzim Basha, organizoi një drekë pune me ambasadorët e vendeve të Bashkimit Europian, SHBA dhe OSBE-së. Në takimin që zhvilloi dje me diplomatët, Basha ndau shqetësimin për situatën politike në vend, kursin anti-ligjor të qeverisë siç i quan opozita dhe për aktet e saj të fundit që lidhen me konsensusin politik.
Sipas njoftimit të shpërndarë nga zyra e shtypit e Partisë Demokratike, mësohet se Basha ka diskutuar me ambasadorët për nismën e re të qeverisë ndaj administratës publike. Kjo nismë sipas PD-së, ka të bëjë me vonesën e botimit të vendimit të Gjykatës Kushtetuese në fletoren zyrtare, vendim që ka hedhur poshtë aktin normativ që shtyu zbatimin e Ligjit për Nëpunësin Civil, si dhe hartimi pa asnjë transparencë i një projekt-ligji të ri që parashikon 16 nene anti-reformë që dobësojnë statusin e nëpunësit dhe cënojnë sigurinë juridike të administratës.
“Duke u ndalur tek reforma territoriale, Basha tha se konsensusi është i domosdoshëm për këtë proces, në mënyrë që rezultatet të jenë të qëndrueshme dhe të gjithëpranueshme. Kryetari i Partisë Demokratike, duke iu përgjigjur shqetësimit të ambasadorëve për gjendjen e rendit dhe të sigurisë, në veçanti të situatës alarmante të tranzitimit të drogës nga Shqipëria drejt BE-së, tha se kjo vjen si pasojë e dëmtimit të Policisë së Shtetit, nga shkarkimet masive që ka bërë qeveria, dhe nga zëvendësimi i profesionistëve me militantë partiakë.
Me ngritjen e Komisionit Hetimor për veprimtarinë e Policisë së shtetit, theksoi Basha, ne kërkojmë jo vetëm të evidentojmë rastet e shkeljes së ligjit, por dhe të kontribuojmë në korrigjimin e tyre.
Ambasadorët u informuan mbi aktet e vazhdueshme antiligjore dhe anti konsensus të qeverisë për vënien nën kontroll politik të institucioneve të paravura, si ILDKP dhe AMA. Si dhe për rastin më të fundit të prishjes së konsensusit politik, që është ndërhyrja e qeverisë në ligjin për financimin e partive politike”,- thuhet një njoftimin e Partisë Demokratike.
Më tej bëhet e ditur se Basha i njohu ambasadorët me pakënaqësinë që po krijon qeveria me mënyrën e saj të funksionimit lidhur me transparencën e vendimeve të saj, sidomos me krahasimin e premtimeve që kjo mazhorancë ka bërë para se të merrte pushtetin më 23 qershor.
“Kryetari i Partisë Demokratike i siguroi ambasadorët se opozita do të bëjë gjithcka për ta detyruar qeverinë të japë llogari dhe të bëjë transparencë para qytetarëve shqiptarë.
Z.Basha i garantoi përfaqësuesit e vendeve të Bashkimit Europian, OSBE-së dhe SHBA-së, se Partia Demokratike do të jetë një mbështetëse pa rezerva e procesit të integrimit europian të Shqipërisë”,-thuhet në njoftimin e zyrës së shtypit.
Brenda një harku kohorë prej tri javësh, Partia Demokratike ka organizuar dy takime me përfaqësitë e huaja të trupit diplomatik të akredituar në Tiranë. Tematikat kryesore të këtyre takimeve kanë qenë vendimet e fundit të qeverisë në raport me transparencën dhe respektimin e ligjit. Gjithashtu opozita para diplomatëve të huaj ka ngritur edhe shqetësimin për nismat e qeverisë për të ndryshuar strukturën dhe përbërjen e disa prej institucioneve të pavarura në vend, përfshi këtu, ILDKP, AMA-n, Këshillin Drejtues të RTSH-s, etj.
Basha në Shkodër/ “Marshim për t’i vënë kufij gënjeshtrës, rrilindja doli rrenë!”
Protesta, Basha: Shkodra s’ka se si të mos jetë e para
Kryetari i Partisë Demokratike Lulzim Basha në kuadër të turit të tij të takimeve për anëtarësimet e reja në PD, zhvilloi dje një takim në qytetin e Shkodrës. Në këtë aktivitet Basha ftoi të gjithë demokraët të bëhen pjesë e protestës së opozitës më datën 20 shkurt. Një vend të rëndësishëm në fjalën e kreut të PD-zë, zuri edhe rinia shqiptare. Sipas Bashës, brezi i ri po vërshon në dyert e hapura të Partinë Demokratike. “Ky është lajmi më i mirë jo vetëm për demokracinë anembanë vendit, por për demokracinë dhe për shpresën shqiptare në këtë kohë të zymtë kur vendi bombardohet çdo ditë me lajme që flasin vetëm për përkeqësim të gjendjes ekonomike dhe shoqërore, vetëm për rënie të treguesve të punësimit, zhvillimit, konsumit, investimeve, vetëm për rritje në krahun tjetër të treguesve të varfërisë, krimit, trafiqeve, drogës, korrupsionit; vetëm për rritje të rreziqeve që kërcënojnë gjithmonë e më shumë aspiratën mbarëpopullore të integrimit të vendit në Europë dhe vetë demokracinë në kolonat e saj të ligjit, të drejtave dhe lirive”,-deklaroi Basha.
Më herët kreu i PD-së ka zhvilluar disa takime në qytetet, Durrës, Elbasan e Kurbin. Nga qyteti i Shkodrës, Basha ftoi rinën ti Bashkohet PD-së. Duke folur për qeverisjen e majtë, Basha vuri theksin tek vendimet e funidt të saj, ngërçi i krijuar për ligjin e nëpunësit civil, administratën publike, zbatimi i vendimit të Gjykatës Kushetetuese dhe reforma për ndarjen administrativo-territoriale. Gjithashtu Basha u ndal edhe në pretimet e socialistëve para se të vinin në pushtet.
Lulzim Basha
“Prapa këtij realiteti gjithnjë e më dramatik është qeveria Rama-Meta e cila tallet sa bukur ua hodhi shqiptarëve me premtime kallpe. Është qeveria që përzien çdo ditë ngjyrat e bojërave të dala boje për qeverisjen propagandistike. Qeveria që provokon dhe tenton me të gjithë format e paligjshmërisë dhe pandershmërisë të pushtojë administratën publike, të kapë institucionet, të kapë shtetin, të zhbëjë gjithçka kemi arritur këto vite me Kushtetutë, ligj, demokraci dhe konsensus. Qeveria që kërkon të kthejë prapa demokracinë, të vendosë oligarkinë me para të pista dhe vota të blera mes tyre, me deputetë të peshkuar në format më të neveritshme të poshtërimit të votës së lirë dhe dinjitetit të qytetarëve. Rinia e ka kuptuar, shqiptarët i madh e i vogël e kanë kuptuar dhe po e kuptojmë: Rilindja doli rrenë! Puna e Rilindjes ishte loja, dhe kjo lojë s’ka të bëjë fare me hallet dhe problemet e shqiptarëve, me dëshirat dhe projektet e shqiptarëve, me të ardhmen e shqiptarëve, me të ardhmen tuaj, por vetëm me interesat e ngushta të atyre që e nxorën në tregun e politikës si Kalin e Trojës”,-theksoi Basha.
Duke folur për protestën e demokratëve më 20 shkurt, Basha tha se Shkodra s’ka se si të mos jetë e para. “E ka detyrë ndaj të parëve, brezave dhe së ardhmes që të jetë e para. E para për ringritjen, e para për shpresën, e para për të ardhmen, e para, pse jo, edhe në marshin e protestës popullore të përkujtimit dhe protestës që kemi thirrur në Tiranë këtë të enjte, në 23 vjetorin e rrëzimit të monumentit të Enver Hoxhës si personifikim dhe simbol i diktaturës gjysmëshekullore.”,-tha kreu i PD-së, Lulzim Basha.
