Xhafaj, Gjiknuri e Xhaçka, 6 deputetë, subjekte të SPAK që s’duhet të ishin në raportimin e Dumanit

0
110

Nga Boldnews.al

Disa deputetë të Parlamentit të Shqipërisë duhet të jenë përballë Altin Dumanit dhe prokurorëve të tjerë të posaçëm në zyrat e SPAK-ut. Por, një pjesë e mirë e tyre u ulën dhe dëgjonin me vëmendje raportimin e kreut të Strukturës së Posaçme Anti-Korrupsion në mbledhjen e përbashkët të Komisionit Parlamentar të Ligjeve dhe atij të Sigurisë Kombëtare.

Madje, disa syresh, edhe i bënë pyetje, i shprehën konsiderata dhe dhanë konsiderata servilosëse.

“Boldnews.al” bëri një përmbledhje të deputetëve që u vendosën në mbledhjen parlamentare para kreut të SPAK-ut, por që, në rastin më të mirë, duhet të kishin zgjedhur të mos ishin të pranishëm në atë takim.

1. Fatmir Xhafaj, i vetëquajturi “Babai i Reformës në Drejtësi”, ishte një ndër deputetët socialist që mbajti komentin më të madhe dhe numrin më të madh të pyetje për Altin Dumanin dhe kolegët e tij prokurorë, Adnan Xholi e Klodian Braho.

Xhafaj është subjekt i ligjit “Antimafia”, për shkak se është vëllai i Geron Xhafaj, një eksponent i krimit të organizuar në Vlorë, i dënuar në Itali për përfshirje në grup kriminal që trafikonte lëndë narkotike në Itali.

Në foto (nga e majta): Deputeti Eduard Ndreca dhe Fatmir Xhafaj (në mes), gjatë raportimit të kreut të SPAK-ut

Operacioni “Forca e Ligjit” (OFL), i inicuar në fillim të vitit 2020, parashikonte hetim pasuror për të gjithë subjektet e krimit të organizuar dhe familjarëve të tyre të afërt. Disa vite më parë, u përmend shkarazi në media se struktura e OFL-së i dërgoi Geron Xhafaj dhe familjarëve të tij (përfshirë edhe vëllain Fatmir Xhafaj), formularin për vetëdeklarimin e pasurisë, i cili më pas do i nënshtrohej hetimeve nga SPAK-u.

Nuk ka asnjë detaj nëse SPAK-u ka kryer hetim pasuror ndaj vëllezërve Fatmir e Agron (Geron) Xhafaj, edhe pse kanë kaluar 4 vjet. Tashmë, deputeti Fatmir Xhafaj qëndron para kreut të SPAK-ut dhe bën filozofime mbi forcimin e luftës kundër kriminalitetit.

2. Olta Xhaçka, deputetja e Partisë Socialiste, ish-ministre e Mbrojtje dhe e Jashtme, është subjekt dy herë në hetimet e SPAK-ut. Ajo dhe bashkëshorti i saj, Artan Gaçi, janë pjesë e hetimit për tjetërsimin e një sipërfaqe toke në Dhërmi, ku më pas kryeministri Edi Rama i shpalli “investim strategjik”.

Për këtë çështje mbahet në burg ish-kryebashkiaku i Himarës, Jorgo Goro, ndërkohë që trualli i “investimit strategjik” është vendosur nën sekuestro nga Prokuroria e Posaçme.

Në foto: Deputetja Olta Xhaçka në seancën raportuese të kreut të SPAK, Altin Dumani

Olta Xhaçka është gjithashtu pjesë e një hetimi të zhvilluar nga SPAK-u për procedurat e zhvilluara nga Ministria e Mbrojtjes, kur drejtohej nga Xhaçka, lidhur me tjetërsimin e portit të Limionit në Sarandë, i cili u dha për “investim strategjik”.

3. Eduard Ndreca, deputeti socialist i Lezhës që përmendet në dosjen “Metamorfoza 3”, ishte gjithashtu i vëmendshëm në raportimin më të fundit të Altin Dumanit në Parlament.

Të dhënat e dosjes hetimore tregojnë një pasazh, në të cilat Arian Tuku, dhëndri i ish-deputetit Arben Ndoka, diskuton në Tetor të vitit 2020 me një bashkëpunëtorin e tij, për sigurimin e një ngarkese prej rreth 300 kg lëndë narkotike, kanabis.

Në foto: Pjesë nga dosja hetimore “Metamorfoza 3”, ku përmendet “Edi”, Eduard Ndreca

Tuku thotë se për këtë ngarkesë ka folur me “Edin”, të cilin SPAK-u e identifikon si kryetari i Partisë Socialiste në Lezhë në atë kohë (viti 2020).

Për arsye të pavarura prej tyre, takimi me Arian Tukut dhe “Edit” nuk kryhet. Por, Tuku e siguron këtë ngarkesë nga Armando Ndreca, vëllai i “Edit”.

Të gjithë të dhënat tregojnë se “Edi” është deputeti aktual i Partisë Socialiste, Eduard Ndreca. Gjatë operacionit “Metamorfoza 3”, SPAK-u lëshoi urdhër arresti për Armando Ndrecën, por mesa duket nuk pati letër mjaftueshëm për të vënë pas hekurave edhe deputetin Ndreca. Dhe, ky i fundit është i lirë të shkoj në Parlament, për më tepër të qëndrojë para kreut të SPAK-ut.

4. Damian Gjiknuri, deputet socialist, ish-Ministër i Energjitikës, është një prej emrave kyç në atë që konsiderohet si “afera e inceneratorëve”. Ai është në top-listën e personave të kallëzuar penalisht nga Partia Demokratike, pas përfundimit të punimeve të Komisionit Hetimor Parlamentar për çështjen e impianteve të djegies së mbeturinave.

Në foto: Deputeti Damian Gjiknuri, duke pyetur drejtuesin e SPAK-ut

Deri më tani, Gjiknuri është lënë jashtë listës së personave të hetuar dhe ai u shfaq në mbledhjen parlamentare, duke i kërkuar “llogari” kreut të SPAK-ut, gjatë seancës raportuese të zhvilluar këtë të Mërkurë (22 maj 2024).

5. Monika Kryemadhi, deputete e Partisë së Lirisë, është prej muajsh nën hetim nga SPAK-u, nën dyshimet e pastrimit të parave. Sipas raportimeve mediatike, Kryemadhi është pjesë e hetimeve për pasurinë e saj, si edhe për një lobim të kryer për zhvillim takimesh në Shtetet e Bashkuara të Amerikës, së bashku me bashkëshortin e saj, ish-Presidentin Ilir Meta.

Në foto: Deputetja e PL, Monika Kryemadhi, gjatë seancës dëgjimore

Kryemadhi ishte gjithashtu pjesë e mbledhjes së përbashkët të Komisionit të Ligjeve dhe Komisionit të Sigurisë, ku raportuan drejtuesit e Prokurorisë së Posaçme.

6. Xhemal Qefalia, deputet i Partisë Socialiste, i kallëzuar në SPAK së bashku me familjarë të tij të afërt për përfitime të dyshimta nga fondet e Bashkisë së Tiranës.

Në foto: Deputetët Olta Xhaçka dhe Xhemal Qefalia në seancën raportuese të kreut të SPAK

Ai ishte deputeti që, për shkak të pozicionit të tavolinës, qëndronte më afër kreut të Prokurorisë së Posaçme, kur ky i fundit raportonte shifrat e aktivitetit institucional për vitin 2023.

Pas një “inflacioni” të tillë deputetësh, subjekte të SPAK-ut, ndoshta do të ishte më mirë që Altin Dumani të kërkonte që të mos raportonte në atë sallë, derisa këta individë të mos ishin pjesë e seancës dëgjimore.

Por, as deputetët, subjekte të SPAK-ut, nuk dolën nga salla, dhe as Dumani nuk refuzoi të raportonte para tyre. Dhe kështu, çdo gjë shkoi mirë e bukur, sikur të mos ketë ndodhur asgjë.

Web Agency, Digital Agency, Web Development Agency

LEAVE A REPLY

Please enter your comment!
Please enter your name here