Kryeministrja italiane Giorgia Meloni ndërpreu pushimet e saj në Puglia dhe dje me traget drejt Shqipërisë.
Me ftesë të kryeministrit Rama, Meloni së bashku me familjen mbërritën në Vlorë ku u pritën nga kreu i qeverisë.
Mediet italiane kanë zbardhur disa nga çështjet që dy krerët e qeverive kanë biseduar.
Sipas medias quotidiano.net, Rama dhe Meloni kanë diskutuar mbi çështjet politike që prekin dy brigjet e Adriatikut, nga prania (masive, deri tani) e sipërmarrësve italianë te emigracioni, nga lufta në Ukrainë tek e ardhmja e Shqipërisë në BE.
Në tryezën e bisedimeve sipas medias italiane tema të ‘nxehta’ ishin edhe ato të energjisë dhe marrëdhënieve mes BE-së dhe vendeve të zonës së Ballkanit, çështja e gazsjellësit nënujor të Adriatikut, apo hipoteza e ndërtimit të një centrali bërthamor në territorin shqiptar.
Meloni u prit nga Rama në Portin e Vlorës dhe më pas ajo u zhvendos drejt ambienteve të vilës qeveritare në Dhërmi.