Kategoria Superiore do të ulë siparin e javës së 10-të ose e përkthyer ndryshe javën e parë të fazës së dytë me dy ndeshje interesante ditën e sotme.
Në orën 14:00, në stadiumin “Selman Stërmasi” do të luhet takimi Tirana-Kukësi.
Kampionët në fuqi të Shqipërisë duan kthesën pas humbjes së javës së kaluar ndaj Erzenit.
E njëjta gjë vlen edhe për verilindorët e Enkeleid Dobit, të cilët synojnë fitoren për të hedhur pas krahëve atë disfatë ndaj Egnatias ndeshjen e kaluar.
Në po të njëjtën orë, në stadiumin “Arena Egnatia” do të luhet sfida Egnatia-Partizani.
Rrogozhinasit e Shpëtim Duros duan me çdo kusht vazhdimësinë e rezultateve pozitive pas triumfit ndaj Kukësit, kjo gjë vlen edhe për të kuqtë nga kryeqyteti, të cilët kanë për synim tre pikët dhe shkëputjen në krye të renditjes.
