Pasagjerët që kanë marrë avionët mbrëmjen e së hënës për të fluturuar drejt destinacioneve të ndryshme, kanë mbetur të habitur kur për shkak të një gabimi në sistem, siç dëgjuan rrotull, oficerët e Policisë i lejuan të kalonin pa asnjë kontroll. Asnjë kontroll, mjaftonte vetëm bileta.
Një qytetare që u nis drejt Londrës njoftoi të afërmit e saj për këtë ndodhi, e cila iu duk shumë e dyshimtë, por kryetari i PD-së, Sali Berisha i dha një emër asaj situate absurde: “Ballkani i shqyer!” – një aludim për rreziqet e të ashtuquajturit “Ballkan i Hapur” që promovon kryeministri dhe akuzoi kreun e Ministrisë së Brendshme, Blendi Çuçin, bashkëpunëtorin më të afërt të Ramës, si zbatuesin.
“Ministri i familjes, Çuçi, heq kontrollin e Policisë në Rinas. Lexoni denoncimin e udhëtarit dixhital” shkroi Berisha në vijim.
Qytetari tregoi:
“Mirëmbrëma Doktor. Diçka e çuditshme po ndodh në Rinas. Thonë që nuk punon sistemi dhe i kanë hapur dyert fare duke kaluar mbrëmë çdokush që ka biletë, pa kontroll fare. Edhe policët kanë dalë nga kabinat dhe u thonë njerëzve kaloni pa kontroll.
Sms-në ma dërgoi mikja që e përcolla në Rinas dhe që udhëtoi për në Londër, pasi unë sapo isha larguar. Por e pyeta sërish dhe më tha që është e vërtetë, ka urdhëruar ministri Çuçi. S’po marrim vesh ç’po ndodh tha, se na futën pa kontroll fare dhe na thanë “kaloni se nuk punon sistemi”.