Ministria e Jashtme Bullgare ka goditur kryeministrin shqiptar Edi Rama për deklaratat e tij që i cilësoi si “të paprovokuara dhe haptazi antibullgare” në Forumin Strategjik të Bled.
Duke folur në forumin e 29 gushtit, Rama tha se nuk është e vërtetë që lufta e Rusisë ndaj Ukrainës ka përshpejtuar “PO”-në për negociatat e anëtarësimit të Shqipërisë në Bashkimin Evropian.
“Lufta nuk përshpejtoi asgjë, sepse “po-ja”, për Shqipërinë ishte aty, nëse nuk do të ishte Bullgaria. Por Bullgaria është sigurisht atje dhe ajo rrëmbeu Maqedoninë e Veriut dhe Shqipërinë shumë kohë më parë, ndërkohë që të gjitha vendet e tjera anëtare ishin gati t’i thoshin ‘Po’ Shqipërisë pas tetë vjetësh”, – tha Rama.
“Me fjalë të tjera, ishte Bullgaria dhe jo Rusia që e nxiti këtë. Ishte një vend i NATO-s që rrëmbeu dy anëtarë të tjerë të NATO-s ndërsa filloi lufta,” shtoi Rama.
Ministria e Jashtme e Bullgarisë tha më 31 gusht se deklarata e Ramës se Bullgaria kishte bllokuar fillimin e negociatave të anëtarësimit të Shqipërisë në BE për tetë vjet ishte e rreme.
Kjo ishte “sjellje e papranueshme dhe e pahijshme e një kryeministri të një vendi kandidat për anëtarësim në BE”, tha Ministria e Jashtme.
“Ministria e Jashtme ka shprehur tashmë qëndrimin e saj në lidhje me retorikën antibullgare të Edi Ramës, e cila është kthyer në një refren të përhershëm të fjalimit të tij politik. Tani ajo është e kombinuar me një fokus anti-evropian dhe një përpjekje për të poshtëruar mekanizmat e procesit evropian”, pohon ministria.
“Bullgaria rezervon të drejtën të reagojë në mënyrën e duhur ndaj sjelljes së kryeministrit shqiptar, duke ndjekur parimet e së drejtës ndërkombëtare dhe evropiane”, thuhet në deklaratë.
