Zëvendëskryetari i Partisë së Lirisë, Agim Nesho ka deklaruar se qeveria e kryeministrit Rama është krejt e paaftë për të luftuar korrupsionin dhe krimin e organizuar apo për të ndëshkuar autorët e vjedhjes së zgjedhjeve dhe depolizitimit të administratës.
Nesho thekson më tej pavarësisht se Bashikimi Evropian hapi negociatat me Shqipëria, në vend vijon mungesa e vullnetit politik për të realizuar kushtet e kërkuara nga Bundestagu Gjerman dhe për të kthyer shtetin e së drejtës në Shqipëri, për të luftuar korrupsionin dhe lidhjen me krimin e organizuar.
Deklaratë e Zëvendëskryetarit të Partisë së Lirisë, z.Agim Nesho: Anëtarësimi sa më shpejt i Shqipërisë në Bashkimin Europian është një nga qëllimet kryesore të Partisë së Lirisë
Anëtarësimi sa më shpejt i Shqipërisë në Bashkimin Europian është një nga qëllimet kryesore të Partisë së Lirisë. Hapja e negociatave për anëtarësim në BE ishte një akt i nevojshëm që e afron më tepër Shqipërinë drejt rrugës europiane, por jo i mjaftueshëm për të realizuar sa më parë aspiratën e popullit tonë për anëtarësim në BE. Ne falënderojmë vendet e BE-së dhe Komisionin Evropian për gjykimin dhe veprimin e tyre të matur për t’i përfshirë vendet e Ballkanit Perëndimor sa më shpejt në BE me një vizion të qartë gjeopolitik për të bashkuar hapësirat evropiane dhe mbyllur rrugën e hyrjes së influencave të huaja në Europë. Ndërgjegjësimi i faktorit perëndimor përpara një situate të vështirë dhe provokimit rus për të ndryshuar rendin botëror të bazuar në ligj, është dhe duhet të jetë për Shqipërinë një detyrim i shtuar për ta realizuar këtë proces sa më parë dhe sa më shpejt. Aktet festive të Qeverisë Rama për këtë fazë të ndërmjetme të procesit të integrimit, një festim i nisur tre vjet më parë pa arritur asgjë, tregojnë që Qeveria përpiqet të krijojë dhe punojë për fasadën e jashtme dhe jo çfarë duhet të bëjmë.
Vazhdon mungesa e vullnetit politik për të realizuar kushtet e kërkuara nga Bundestagu Gjerman, Parlamenti European për të kthyer shtetin e së drejtës në Shqipëri, për të luftuar korrupsionin dhe lidhjen me krimin e organizuar, për të depolitizuar administratën civile dhe ndëshkuar autorët e vjedhjes së votës së lirë dhe manipuluesit e zgjedhjeve. Kjo Qeveri është e paaftë për të realizuar këtë detyrë para popullit të saj. Kjo Qeveri e shikon procesin si të njëanshëm duke lënë mënjanë opozitën; duke keq-administruar dhe shpërdoruar fondet publike dhe pasurinë e popullit në nëpërkëmbje të vlerave dhe parimeve europiane; duke anashkaluar dhe refuzuar Procesin jetik të Berlinit dhe ofruar projekte të tjera paralele si Ballkani i Hapur që e largojnë më shumë Shqipërinë nga rruga europiane. Partia e Lirisë nuk do të lejojë që integrimi europian të mbetet në dorë të individëve autokratë, të pangopur me pushtetin personal, por do të punojë për t’ja kthyer këtë vendim-marrje popullit shqiptar. Lufta për të legjitimuar institucionet dhe kthyer demokracinë direkte tek populli nëpërmjet referendumeve sapo ka filluar dhe do të vazhdojë deri në fund sa shqiptarët të kenë Shqipëri Europiane.
