Shqipëria ka çmimin më të lartë të naftës në rajon dhe ndër më të lartit në botë.
Por ministrja e Financave, Delina Ibrahimaj, duke folur në Kuvend për rritjen e çmimeve për shkak të krizës, i ka dalë në mbrojtje Bordit duke thënë se nëse nuk do të ishte ngritur Bordi i Transparencës, çmimi i karburantëve do të ishte shumë më i lartë nga sa është sot.
“Ju thoni që ne kemi ngritur borde fashiste a komuniste, nuk di si i quani. Nëse bordet nuk do të ishin ngritur, do të kishin çmime më të larta për karburantet se kemi sot. Ne mbështetëm shqiptarët që nuk i mund të përballojnë çmimet e rritura të konsumit”, tha Ibrahimaj.
Pas vendimit të fudnit të Bordit të Transparencës, nafta në vend tregtohet me 249 lekë për litër. Ndërsa çmimi i benzinës është 242 lekë për litër dhe ai i gazit 83 lekë.
Kurse zv/kryeministri Arben Ahmetaj tha se PS është e majtë dhe për këtë arsye do të ndihmojë shtresat në nevojë. Ndërsa përshkruante mënyrën sesi qeveria i është përgjigjur krizës së çmimeve pas pushtimit të Ukrainës, Ahmetaj shtoi se shumë shpejt do të shtohen edhe 500 milionë lekë për naftën e fermerëve.
Ahmetaj u ktheu përgjigje edhe atyre që thonë se Shqipëria radhitet mes vendeve me çmimin më të lartë të naftës. Sipas zv/kryeministrit, ka shtete të Evropës që i kanë çmimet edhe më të larta.