Procesi i votimit në 6 bashkitë në vend ka vijuar pa problematika domethënëse deri në orën 15:00.
Në një deklaratë për mediat, kreu i KQZ-së, Ilirjan Celibashi tha se problematika janë evidentuar kryesisht me kamerat e vëzhgimit dhe përdorimin e pajisjeve të identifikimit elektronik.
Ai bëri me dije se në 5 qendra votimi, identifikimi është bërë manualisht dhe në 15 të tjera është bërë zëvendësimi i pajisjeve.
‘Kemi marrë raportime mbi problematikat në disa QV. Në total 13% e këtyre problematikave lidhen me kamerat e vëzhgimit. 73% me përdorimin e PEI, 15% me çështje të administrimit të zgjedhjeve. 40% nga bashkia Shkodër, 30% Durrës, 12% Lushnjë, 9 %Dibër, 6% Rrogozhinë, nga Bashkia Vorë nuk ka raportime për problematika. Për pajisjen e identifikimit elektronik, në 5 qendra votimi identifikimi është bërë manualisht.
Në 15 qendra votimi është bërë zëvendësimi i pajisjes elektronike të identifikimit elektronik. Në lidhje me kohën e hapjes së QV, 70% janë hapur në orën 7:00, 25% janë hapur deri në orën 07:30. Kemi bërë edhe verifikime në terren të situatës dhe nuk raportohen problematika domethënëse.
Ka disa probleme me mënyrën e zhvillimit të procesit të votimit, që ka pasur grumbullime të personave të paautorizuar, kemi komunikuar me KZAZ respektive dhe është raportuar që situata është kthyer në normalitet’, tha Ilirjan Celibashi.
