Kandidati i Shtëpisë së Lirisë për Bashkinë e Shkodrës, Bardh Spahia, ka folur në një takim me qytetarët e njësisë administrative Rrethina në Shkodër.
Spahia thekson se më datë 6 mars do të nisë një epokë e re për Shkodrën, por edhe për mbarë Shqipërinë.
“Basha na ka tradhtuar neve si demokratë. Më 6 mars nis ndryshimi i madh në Shkodër e në mbarë Shqipërinë. Këto zgjedhje quhen vendore, por janë tërësisht politike, sepse ne e nisëm me primare, ku me votë të lirë anëtarët e PD zgjodhën përfaqësuesit e vet.
Ndihem thellësisht mirënjohës prej besimit nga ju, por ndjej edhe peshën e besimit që ma keni dhënë. Më 6 mars le të nisë një erë e re dhe opozitë të re, në përballjen me kundërshtarin tonë politik historik, Ramën dhe mbështetësit e tij”, deklaroi Spahia.
