Zgjedhjet në FSHF po prodhojnë tension të madh sidomos pas përfshirjes tashmë hapur të politikës dhe konkretisht të Erion Veliajt në këtë garë.
Ditën e sotme, FSHF zbuloi letrën ku Shoqata e Futbollit të Tiranës ka dërguar në FIFA një ankesë për ndërhyrjet, shantazhe dhe kërcënimet që ka marrë nga Bashkia e Tiranës dhe Erion Veliaj.
Por pak orë pas kësaj letre një foto e kryetarit të kësaj Shoqate, Sulejman Mema me Veliajn bëri zhurmë të madhe teksa vet ish trajneri dhe një nga emrat e shquar të futbollit shqiptar ka zbuluar të vërtetën.
Në një intervistë për Newsport.al, vetë ai e ka pranuar hapur se Erion Veliaj e ka kërcënuar për letrën e mësipërme teksa sqaron dhe pozicionin e tij në këtë Shoqatë.
“Përshëndetje zoti Mema. Sot kryebashkiaku Veliaj ka postuar një foto ku qëndronit së bashku me të. A mund të na tregoni se çfarë ka ndodhur?
Kam pasur një takim ditën e sotme me zotin Veliaj. Kemi folur për situatën aktuale dhe tensionin e krijuar.
– Po çfarë iu tha konkretisht?
Më ka thënë që do t’iu çojmë në Prokurori për këto deklarata që keni bërë dhe shkresën e dërguar në FIFA.
– Po si mund të ndërhyjë politika në futboll?
Unë i thashë që jemi të gatshëm ta ndjekim këtë çështje në çdo rrugë ligjore.
– Ndërkohë i keni dhënë fund qëndrimit në krye të Shoqatës Rajonale të Tiranës. Pse ky vendim i juaji në një moment kaq delikat?
Mua më ka mbaruar mandati si Kryetar i Shoqatës. Do të mblidhemi të bëjmë analizën vjetore.
– A do të vazhdoni të jeni pjesë e Shoqatës?
Sigurisht që po! Do të vijoj të jem anëtar i saj.
– Tension i madh para zgjedhjeve të FSHF-së. Jeni pro apo kundër presidentit Duka?
Në këto zgjedhje mbështes dhe jam me presidentin Duka. Jam gjithashtu një punonjës i Federatës Shqiptare të Futbollit.