Nga Ylli Manjani
Nuk e di, realisht, ku dhe si u dogj ai flamur i Serbisë në protestën e djeshme.
Nëse është bërë, padyshim tregon papjekuri dhe kaq.
Por që kjo të meritojë arrestime dhe ndjekje penale është jo thjesht joproporcionale, por sjellje fatale antidemokraci!
Nuk u dogj flamuri zyrtar i Serbisë, dmth një flamur i vendosur në ndonjë institucion diplomatik.
Flamujt që vendosen në rrugë digjen gjithandej në botë dhe askujt nuk i shkon mendja të procedojë penalisht njerëzit.
As në Serbi nuk ndodh kjo gjë!
Ose të paktën ne s’kemi dëgjuar të jetë proceduar ndonjë serb pse ka djegur flamurin e Shqipërisë apo të Kosovës!? Dhe ka patur serbë që s’ia kanë përtuar këtyre gjerave…
Aktin e djegies simbolike të flamujve në shumë raste jurisprudencat në vendet demokratike e konsiderojnë si thelbin e lirisë së shrehjes.
E kuptoj zellin e policisë politike për të bërë lajme para flamurdjegurve, por gjykoj se prokurorët dhe gjykatësit nuk kanë përse të jenë pjesë e këtyre pisllëqeve antidemokratike.
Është e tepërt të kriminalizosh njerëz përse shprehin një mendim apo qoftë edhe një duf.
Kapni ndonjë kriminel që lirinë e nxjerrjes së dufit e shpreh me fishekë apo me drogë, o policë të shtetit!
Lërini njerëzit të shprehin dufin politik, se nuk e ndalni dot edhe po të doni.
****
Ndërkohë ky është edhe një shembull tjetër që tregon se çfarë Kodi Penal bolshevik kemi në fuqi.
Kodi që kriminalizon njerëzit pse shprehen pa i bërë dëm askujt, në një protestë.