Departamenti i Shtetit ka reaguar për ‘Zërin e Amerikës’, lidhur me akuzat e bëra nga ish-kryeministri Sali Berisha në adresë të ambasadores së SHBA në Tiranë, Yuri Kim.
DASH thotë se akuzat ndaj Kim janë shqetësuese.
Në këtë deklaratë, një zëdhënës i DASH thekson se ambasadorja Yuri Kim, në Tiranë përfaqëson presidentin e majtë, Joe Biden.
Për qëndrimet e pazakonta të Kim ka dhjetëra shkrime denoncuese edhe nga mediat amerikane që e akuzojnë atë se po zbaton në Tiranë agjendën e George Soros.
Ja reagimi i DASH për Zërin e Amerikës
Në përgjigje të pyetjes së Zërit të Amerikës lidhur me akuzat e bëra nga Berisha për Kim se ajo po sillet si guvernatore në Shqipëri dhe se mbështet kryeministrin Edi Rama, zëdhënësi i Departamentit të Shtetit Ned Price tha se “Uashingtoni është i shqetësuar nga sulmet e pajustifikuara ndaj ambasadores tonë në Tiranë”.
“Këto sulme të shëmtuara nuk përfaqësojnë popullin shqiptar. Siç e ka udhëzuar Uashingtoni”, thekson zëdhënësi Price. “ambasadorja Kim ka shpjeguar dhe zbatuar qartë politikat e Shteteve të Bashkuara, përfshirë vendosmërinë e Presidentit Biden për të mbajtur përgjegjës ata persona që përfshihen në korrupsion, ose minojnë demokracinë.”
Shtetet e Bashkuara, thekson më tej zëdhënësi, vlerësojnë marrëdhëniet me popullin shqiptar dhe vitin e ardhshëm do të kremtojmë 100 vjetorin e vendosjes së marrëdhënieve mes dy vendeve.
Marrëdhëniet tona, përfundon zëdhënësi, i mbijetuan komunizmit dhe diktaturës për shkak të angazhimit të përbashkët për demokraci dhe respektit të ndërsjellë.
