Fermerët e zonës së Kutallisë në bashkinë Dimal po përballen me probleme të shumta, që lidhen me farën e prodhimit Ozgan Anardi. Jane rreth 700 hektare sera në të gjithë zonën e Kutallisë që janë prekur nga kjo fare që banorët e quajnë “farë e keqe”, pasi prodhimi që sigurohet prej kësaj fare jo vetëm që është tepër i dobët por kalbet brenda 24-orëve. Kjo ka bërë që i gjithë prodhimi i vjelë nga fermerët të hidhet në kosh, nqs nuk gjen treg brenda ditës për tu shitur.
Gjendja e krijuar po i çon fermerët drejt falimentimit, pasi thuajse 70% e tyre kanë marrë kredi në bankë për të siguruar prodhimin në sera, duke filluar nga blerja e farës, helmet, plehrat kimike e deri tek shërbimet që i duhen prodhimit deri në pjekjen e tij të plotë. Fermerët kërkojnë zgjidhje dhe dëmshperblim nga shteti, pasi ata thonë se e kanë paguar rregullisht çmimin e farës por fara ka dalë e keqe dhe që ua ka shitur këtë farë nuk mban përgjegjësi.
