Banorët e fshatit Lumas kanë depozituar sot në Prokurorinë e Posaçme kundër Korrupsionit dhe Krimit të Organizuar (SPAK) një kallëzim penal për kryeinspektorin e IMT-së, Albert Zybeja, i cilin sipas tyre ka shpërdoruar detyrën.
Pas takimit që një përfaqësi e banorëve zhvilloi me kryeinspektorin Zybeja, mësuan se nuk kishte marrë akoma një vendim për pezullimin e punimeve në kanionin e Sinecit, edhe pse IMT-ja e Elbasanit gjeti të tilla me bollëk. Kështu që banorët kërkojnë nga SPAK që kryeinspektori të ndiqet penalisht për “shpërdorim detyre”, pasi nuk ka marrë asnjë masë për punimet tek zona e mbrojtur.
Në kallëzimin penal të 123 banorëve të Lumasit thuhet se kyeinspektori Zybeja jo vetëm që nuk ka vijuar me procedurat e mëtejshme ligjore por po mundohet të zhbëjë procesverabalin e mbajtur nga ana e 3 inspektoreve të IMT Elbasan për të mbrojtur kështu edhe kryebashkiakun e Kuçovës, Kreshnik Hajdari. Po ashtu ata pretendojë se janë manipuluar provat për të mos provuar ndërhyrjen kriminale në Sinec.
Pak ditë më parë, pas inspektimit të kryer nga IMT Elbasan, u konstatua se në zonën e Sinecit janë kryer shkelje të rënda, duke e cilësuar ndërtimin si kundravajtje ligjore. 3 inspektorët e IMT-së Elbasan: Klajdi Merxhani, Aranit Çela dhe Ardian Lufo dolën në përfundimin se ndërtimi nuk kishte leje administrative për ujin, s’kishe autorizim për ndërhyrje dhe shumë shkelje të tjera.