Dhjetëra mjekë dhe punonjës të shëndetësisë protestuan për rreth 20 minuta para urgjencës së QSUT-s në një protestë të lajmëruar më herët nga Sindikata e Punonjësve të Shërbimit Shëndetësorë.
Në protestë të heshtur u kërkua që mjekët të pajiseshin me siguracion jete dhe që ata që humbnin jetën nga COVID-19 të shpalleshin dëshmorë.
Mjekët mbajtën pankarta dhe foto të doktorëve që kishin humbur jetën në përballje me sëmundjen. Ata kërkuan siguracion jete, për vete dhe familjarët.
Një takim i kërkuar me kryeministrin dështoi, pasi sipas doktor Ibrahim Brukës për t’i pritur kishin dalë këshilltarët e tij.
Sindikata e Mjekëve thotë se, Rama i ka mashtruar, ndryshe nga sa u kishte thënë një ditë më parë.
Kërkesat e mjekëve
Të shpallen dëshmorë të kombit të gjithë ata pjesëtarë të personelit shëndetësor të cilët humbin jetën në këtë luftë me këtë armik të padukshëm.
Të bëhet sigurimi i jetës së personelit shëndetësor, me qëllim që familjet e tyre të mund të vazhdojnë jetën dhe pas fatkeqësive të mundshme në këtë luftë.
Rritje e vlerësueshme e trajtimit financiar të personelit shëndetësor.
Personelit shëndetësor të çdo niveli t’i sigurohen të gjitha kushtet në punë për parandalimin e infeksionit sipas të gjithave standardeve kombëtare dhe ndërkombëtare.
Në protestën e sotme, mjekët paralajmëruan sërish protestë në rast mosplotësimi të kërkesave.
/Foto: BIRN
