Rreth 200 punonjës të firmave të peshkut, bletarisë dhe blegtorisë të cilat veprojnë në zonën e Karaburunit dhe Pashalimanit në Orikum kanë dalë në protestë.
Ata kundërshtojnë urdhrin e Ministrisë së Mbrojtjes për vendosjen e një orari zyrtar për hyrjen në bazën e Pashalimanit, për të ushtruar aktivitetin e tyre.
Sipas urdhrit të Ministrisë, bizneset do të lejohen të hyjnë dhe të dalin në bazën ushtarake nga ora 8 deri në orën 15, ndërsa pas kësaj ore hyrja ndalohet.
Prej dy orësh me dhjetëra automjete presin në radhë për të hyrë në postobllokun e kësaj baze. Punonjësit kërkojnë një zgjidhje dhe një takim me drejtuesit e kësaj baze, por asnjë zgjidhje nuk iu është dhënë.
Ata shprehen se do të bllokojnë hyrjen për në baze duke mos lejuar asnjë automjet deri në zgjidhjen përfundimtare.
Edhe pak ditë më parë ata protestuan duke kerkuar ndërhyrje dhe zgjidhje urgjente të problemit të tyre.
