Kryetari i Grupit Parlamentar të Partisë Socialiste, Taulant Balla, ka qenë i ftuar në studion e lajmeve në News24, për të folur për krizën politike në Shqipëri. Balla tha se opozita, pavarësisht se ka lënë mandatet, do të jetë e përfaqësuar nga deputetët që po “rimarrin përgjegjësi”, pra duke iu referuar deputetëve që po hyjnë në parlament nga listat e PD-së dhe LSI-së.
“Fajtor kryesor të kësaj situate janë ata që morëm atë vendim. Jemi në fazën që një pjesë e tyre po zëvendësohen. Opozita përsëri është e përfaqësuar në Kuvend, deputetët që po rimarrin përgjegjësi me apo pa ndërmjetësim është i mirëpritur, por jo negociata në kurriz të demokracisë“, u shpreh Balla.
Me sa duket, edhe pas vendimit të paprecedentë të opozitës, mazhoranca është e qetë dhe mjaftohet me fasadën që po zhvillohet, me hyrjen e deputetëve të rinj në Kuvend.
Megjithatë, Balla është shprehur se mazhoranca do të pranojë dialogun, qoftë edhe të ndërmjetësuar nga presidenti Meta.
“Dialogu është gjithmonë i mirëpritur nuk ka ndodhur kurrë që PS të mos jetë pjesë e një dialogu, qoftë me ndërmjetësimin e Presidentit. Ne jemi për dialog për çështje të rëndësishme si për negociatat, kemi qenë për dialogu edhe për reformën zgjedhore, por nuk mund të bëjmë negociata në kurriz të demokracisë“.
