Kohët e fundit duket se vendi është përfshirë ngë një ngërç politik dhe social i gjithanshëm. Ajo më e rëndësishmja është degradimi i sistemit arsimor që ka ngritur në protestë studentët që kërkojnë uljen e tarifave, përmirsimin e kushteve të auditorit dhe konvikteve.
Paralelisht me këto kërkesa, intelektualë të ndryshëm po bëjnë thirrje për vetting të pedagogëve, ndërkohë që jashtë vëmendjes nuk ka mbetur as politika.
Deri më tani janë të paktën katër deputete dhe një ish-zv/ministër i Arsimit që janë denoncuar për plagjiaturë.
Historia nisi me Ervin Demon dhe Blerina Gjylametin, të dy zyrtarë të mazhorancës socialiste, ndërsa rasti i fundit i denoncuar është plagjiatura e Monika Kryemadhit, kryetare e LSI-së.
Demo mori përsipër përgjegjësinë e skandalit ku ishte përfshirë dhe dha dorëheqjen nga posti i zv/ministrit, por të njëjtën sjellje nuk tregoi Gjylameti.
Blerina Gjylameti nuk është deputetja e vetme e Partisë Socialiste që është denoncuar për plagjiaturë. Studiuesit kanë bërë publike edhe rastet e Mimi Kodhelit dhe Ogerta Manastirliut, të cilat njësoj si kolegia e tyre, po përpiqen ta kalojnë në heshtje këtë skandal.
Përveçse deputete në Kuvendin e Shqipërisë, Kodheli dhe Manastirliu mbajnë edhe detyra të tjera të rëndësishme, përkatësisht kryetare e Komisionit për Politikën e Jashtme dhe ministre e Shëndetësisë.
Janë këto deputete që janë kapur në vjedhje, që kanë votuar reformën në arsimin e lartë, dhe që pretendohet se do i japin zgjidhje kërkesave të studentëve për një arsim cilësor.
