Duke u ndalur në situatën ekonomike, kryetarja e LSI-së Monika Kryemadhi tha se qytetarët në Sarandë dhe në të gjithë Shqipërinë po e ndjejnë gjithnjë e më shumë kapjen e ekonomisë dhe kapjen e institucioneve të shtetit.
“Sot është më se flagrante dhe qytetarët e Sarandës apo edhe bizneset e Sarandës janë ato që e ndjejnë edhe më shumë kapjen e ekonomisë. Kapjen e ekonomisë, kapjen e institucioneve të shtetit sepse një nga përballjet që kanë pasur bizneset e Sarandës ka qenë turizmi.
Përballja me hetimin tatimor, me policinë, me taksat, të cila në çdo moment në kulmin e sezonit bllokonin dhe kontrollonin bizneset, në mënyrë të tillë për të gjetur korrupsionin e madh tek kilet e domateve që bliheshin për restorantet apo te kokrrat e vezëve që skuqeshin për turistët.
E gjitha vinte si rezultat i një presioni që bëhej jo vetëm ndaj biznesit, por ushtrohej presion ndaj turistëve, ndaj gjithë infrastrukturës turistike të Sarandës, kur ne e dimë shumë mirë që qyteti i Sarandës është qytet që jeton vetëm nëpërmjet turizmit”, tha Kryetarja e LSI-së Kryemadhi