Kreu i PDIU ka reaguar pas thirrjeve nacionaliste dhe anti-shqitpare dje në Bularat të Gjirokastrës gjatë varrimit të ekstremistit grek Kostandino Kacifas. Shpëtim Idrizi ka kërkuar të mblidhet urgjentisht Këshilli Kombëtar i Sigurisë.
“Ne kishim paralajmëruar se me varrezat e ushtarëve grekë në Shqipëri do bëhej vend pelegrinazhi. Kemi parë me shqetësim dhe indinjatë politikën nën tavolinë të politikës shqiptare. Greqia nuk njeh gjenocidin ndaj shqiptarëve të Çamërisë. Dje u gjendëm përballë një shfaqje të turpshme. Ne dëgjuam thirrjet nacionaliste dhe raciste të grekëve në Bularat. Thirrjet e atyre që guxuan të revokojnë Vorio Epirin. PDIU dhe shoqata Çamëria kërkon sot me forcë të mblidhet urgjentisht Këshilli i Sigurisë Kombëtare. Këshilli i Sigurisë Kombëtare është mbledhur herën e fundit për çështjen Balili. I drejtojmë shtetit shqiptar që nëse nuk vendosni autoritetin e shtetit me Kushtetutë, atëherë na e thoni se do e mbrojmë ne vetë shqiptarët.”-tha Idrizi.