Dalin detaje të reja për operacionin e policisë që goditi grupin e prostitucionit online.
Mesohet se ishte shtetasja me inicialet A. Ll., e cila nxirrte njoftim në faqet Online që ofrojnë punë.
Çdo klient që kontaktonte këtë faqe paguante 100- 200 euro për të marrë “shërbimet” e vajzave.
Policia ka dyshime se ky aktivitet ka rreth 1 vit që vijon punën ne apartamentin qe ishte marre me qera ne zonen e Don Boskos, nga burri i arrestuar.
NJOFTIMI I POLICISE
Më datë 19.02.2018, pas një hetimi disa mujor me metoda speciale të hetimit, nga ana e Seksionit për Trafiqet e Paligjshme të Drejtorisë Vendore të Policisë Tiranë, u finalizua me sukses Operacioni “Chat Line 4”, dhe u arrestuan në flagrancë shtetasit:
• Anushe Ll., 24 vjeçe, banuese në Tiranë, administratore e studios “Chat Line Adult Work”, për veprën penale “Shfrytëzimi i Prostitucionit” parashikuar nga neni 114 i Kodit Penal.
• Met Tali, 25 vjeç, banues në Tiranë, për veprën penale “Prodhimi dhe shitja e narkotikëve”, parashikuar nga neni 283 i Kodit Penal.
Gjithashtu u proceduan penalisht për veprën penale “Shfrytëzimi i prostitucionit” shtetaset:
• A. H., 25 vjeçe.
• A. L., 31 vjeçe.
• A. Xh., 22 vjeçe.
• S. M., 30 vjeçe.
• A. Sh., 21 vjeçe.
• A. T., 23 vjeçe.
• E. R., 23 vjeçe.
Janë shpallur në kërkim për veprën penale “Mbajtja e lokaleve për prostitucion” parashikuar nga neni 115 i Kodit Penal, shtetaset:
• S. B, 33 vjeçe.
• D. G., 29 vjeçe.
Nga veprimet hetimore rezulton se shtetasja Anushe Ll., dyshohet se prej një kohe të gjatë, punësonte vajzat e mësipërme dhe i shfrytëzonte ato për prostitucion virtual, i cili zhvillohej nëpërmjet logimit në faqen “Adult Work”, aktivitet i cili kryhej në një apartament në rrugën “Don Bosko”.
Në këtë aktivitet shtetësja Anushe Ll. dyshohet se është futur nëpërmjet shtetëses D. G., të cilën më herët e ka pasur në administrim, në bashkëpunim me shtetasen S. B.
Gjatë kontrollit të njërit prej apartamenteve ku ushtrohej ky aktivitet i paligjshëm, apartament i cili ishte marë me qera nga shtetasi Met Tali, u gjet dhe sekuestrua në cilësinë e provës materiale 17,4 gr lëndë narkotike e dyshuar “Cannabis Sativa”.
Gjithashtu në cilësinë e provës materiale u sekuestruan:
• 7 kompiutera dhe pajisje të ndryshme që përdoreshin për kryerjen e aktivitetit.
Materialet proceduriale do t’i kalojnë Prokurorisë së Rrethit Gjyqësor Tiranë, për veprën penale:
“Shfrytezimi i prostitucionit”, “Mbajtja e lokaleve për prostitucion” dhe “Prostitucioni” të parashikuara nga nenet 113, 114/2 dhe 115 e Kodit Penal.
