Ministrja e Kulturës, Mirela Kumbaro kujtoi sot 3-vjetorin e vizitës së Papa Françeskut në Tiranë. Në faqen e saj zyrtare në “Facebook”, ministrja Kumbaro risolli në vëmendje vizitën e Papës në vendin tonë, përmes disa fotografive të realizuara ditën e vizitës së tij historike në Tiranë. Në mesazhin e saj, Kumbaro e cilëson 21 shtatorin 2014, një datë të paharruar, duke shtuar se ndjehet shumë e nderuar dhe me shumë fat.
“21 shtator 2014. Një datë e paharruar që më bën të ndjehem përunjësisht shumë e nderuar dhe me shumë fat”, shkruan Kumbaro.
Më 21 shtator 2014 Papa Françesku vizitoi Shqipërinë. Një nga arsyet e vizitës së Papës kishte të bënte me vlerësimin e traditës së shëndoshë shqiptare të harmonisë fetare, një traditë e përshkruar si një model për pjesën tjetër të botës.
