Dy punonjës policie janë vënë në pranga pas arratisjes së ndodhur gjatë paradites së sotme nga Komisariati i Policisë së Pukës.
Gjatë paradites së sotme nga dhomat e shoqërimit të Komisariatit të Policisë Pukë u arratis Ermirjon Nikja. Pas hetimeve SHÇBA ka arrestuar në flagrancë punonjësit e policisë Inspektor Pajtim Bushi dhe Inspektor Dode Preka, me detyrë trupë shërbimi pranë këtij Komisariati.
Arrestimi i dy punonjësve u bë pas kryerjes së veprimeve hetimore ku u konstatua se nga ana e tyre nuk janë zbatuar detyrat funksionale të përcaktuara për sigurimin e personave të shoqëruar dhe ambjenteve ku ata qendrojnë.
Të arrestuarit akuzohen për veprën penale të “Shpërdorimit të detyrës”.
