Administratorja e kopshtit privat “Diren”, Anjeza Shabani (Hushi), e filmuar duke dhunuar një fëmijë tre vjeçar dhe e denoncuar për dhunë mbi dy të mitur të tjerë është dënuar me dy vite burg.
Gjykata e Tiranës në seancën e sotme e deklaroi fajtore Shabanin, e cila akuzohet për keqtrajtim të miturish. Prokuroria kërkoi pak ditë më parë katër vite e gjashtë muaj burg për të, por dënimi u zbut nga gjykata.
Anjeza Shabani, e cila pas martese ka marrë mbiemrin Hushi, akuzohet për “keqtrajtim të të miturve në 3 raste”, si dhe për “fshehje të të ardhurave”.
Por për shkak se ka fituar gjykim të shkurtuar, asaj ulet 1/3 e dënimit. E pandehura, e cila është hetuar me masën e sigurisë “arrest me burg” akuzohet se, në cilësinë e drejtueses së një kopshti të palicencuar, ka keqtrajtuar tre fëmijë që qëndronin në ambientet e administruara prej saj.
Në bazë të veprimeve hetimore të Prokurorisë së Tiranës, rezulton se që prej muajit shtator të vitit 2015, e në vijim, e pandehura Anjeza Husha ka ushtruar aktivitetin e kopshtit privat të fëmijëve, me logon “Diren”, në katin e dytë të një ndërtese 3-katëshe, të ndodhur në Sauk të qytetit të Tiranës. Këtë aktivitet, organi i akuzës thotë se gjatë gjithë kohës jo vetëm që e ka ushtruar pa licencën përkatëse dhe e pa regjistruar në organet tatimore, por edhe duke keqtrajtuar fizikisht dhe psikologjikisht fëmijët që frekuentonin kopshtin në fjalë. Në muajin shtator të vitit 2015, në këtë kopsht është regjistruar edhe fëmija R.A., dhe midis prindërve të tij dhe të pandehurës, është rënë dakord për një pagesë mujore në shumën prej 17.000 lekësh të reja. Rreth muajit janar të vitit 2016, e në vijim, e pandehura në mënyrë të përsëritur është sjellë ashpër me fëmijën R.A., duke ushtruar dhunë fizike ndaj tij, nëpërmjet pickimeve, goditjeve me shpulla, kapjes me duar etj.
Në paraditen e datës 14 qershorit 2016, e pandehura në një gjendje të dukshme nervozizmi ka marrë përdore fëmijën R.A., dhe duke e tërhequr e ka goditur atë 3-4 herë me pëllëmbë në të dy duart. Njëkohësisht ajo i është drejtuar fëmijës me ton të lartë ne fjalët “Pusho-pusho” dhe mbasi e ka futur tek një nga dhomat e kopshtit, e ka lënë aty të vetëm dhe duke qarë.
Mbas rreth një minute, ajo është kthyer përsëri dhe duke i thënë “pusho” e ka marrë me vete duke u larguar për një moment nga dhoma. E ka rikthyer përsëri të vetëm në dhomë dhe mbas rreth dy minutash e ka marrë përsëri, duke e ulur në një karrige, në ambientin ku ndodheshin edhe fëmijët e tjerë të kopshtit.
Mas pas, në këtë ambient, ajo ka filluar që të sillet në mënyrë agresive me fëmijën R.A., duke ushtruar përsëri dhunë fizike ndaj tij. Fillimisht, ajo me dorën e saj të majtë i ka tërhequr veshin e djathtë fëmijës, duke e tërhequr me forcë nga atë karrigia dhe goditur një herë në kokë me pëllëmbën e majtë. Mandej ajo i është drejtuar me fjalët “R… R…, do të duroj ty, kur të them pusho-pusho” dhe e ka larguar nga ambienti. Pas rreth një minute, ajo e sjell përsëri fëmijën R.A., në ambientin ku ndodheshin edhe fëmijët e tjerë, duke i thënë “Hajde këtu shpirti im, ti je shumë i mirë”.
Por, fëmija ka vazhduar që të qajë me zë të lartë dhe Anjeza i është drejtuar me ton të lartë me fjalët “pusho, pusho, pusho, mos të dëgjoj më, djalë i keq”. Ndërsa fëmija vazhdonte të qante, ajo i ka thënë “pusho, pusho, qepe gojën R..n. Mos t’a dëgjoj zërin. Ashtu, shëët, shëët, qepe. Pusho-pusho-pusho. Xhan-xhan R..n” dhe është larguar. Pas rreth 15 minutash, e pandehura Anjeza Hushi është kthyer përsëri dhe i është afruar fëmijës dhe është përpjekur që t’a qetësojë duke e ledhatuar, puthur në dorë dhe afruar pas vetes. Ajo është përpjekur që edhe të luajë me fëmijën dhe ndërsa ky vazhdonte të qante i terrorizuar, ajo është ngritur për t’u larguar dhe i është drejtuar me fjalët “pusho-pusho-pusho, oj ky, sa më mirë aq më keq. Qepe gojën e mos t’a dëgjoj më zërin, pusho, qepe, shëët”. Për shkak të veprimeve të saj të dhunës, fëmijës R.A., i janë shkaktuar dëmtime fizike, të cilat hyjnë në kategorinë e atyre dëmtimeve, të cilat sjellin për pasoja humbjen e aftësisë së përkohshme për punë në masën deri në nëntë ditë (në rastet e të rriturve).
Në muajin shtator të vitit 2015, në kopshtin e të pandehurës, është regjistruar edhe fëmija A.K. Gjatë kohës që ky fëmijë ka qëndruar në kopsht është keqtrajtuar fizikisht dhe psikologjikisht nga e pandehura, pasi ajo në mënyrë sistematike i ka shkulur veshin, pickuar, gjuajtur me shkelma, bërtitur, fyer me fjalët “kokëderr”, “kafshë” dhe mbuluar kokën me batanije edhe pse mund të ishte vapë. Mbas dy muajve që fëmija A.K., ndodhej në kopsht e në vijim, prindërit e tij kanë vënë re se ai ka filluar të shfaqë shqetësime të ndryshme, duke u zgjuar disa herë gjatë natës, qarë dhe ulëritur pa shkak. Në dy raste ata kanë konstatuar shenja dhune dhe konkretisht të nxira në kofshë dhe në shpinë. Për këtë fakt ata kanë vënë në dijeni të pandehurën, por ajo u ka shpjeguar se fëmija ishte zënë me një fëmijë tjetër. Duke qenë se gjendja ka vazhduar e njëjtë, prindërit e kanë hequr fëmijën nga kopshti, dikur rreth datës 10 qershor 2016.
Në të njëjtën periudha në kopsht është regjistruar edhe fëmija E.K. Gjatë kohës që kjo fëmijë ka qëndruar në kopsht është keqtrajtuar fizikisht dhe psikologjikisht nga e pandehura Anjeza Shabani (Hushi), pasi ajo në mënyrë sistematike i ka shkulur veshin, flokët, pickuar, gjuajtur në gjithë trupin, bërtitur, fyer dhe mbuluar kokën me çarçaf edhe pse mund të ishte vapë. Mbas vajtjes në kopsht fëmija ka paraqitur shqetësime të ndryshme si trembje në gjumë gjatë natës dhe qarje pa shkak. Ajo nuk donte të shkonte në kopsht dhe u thoshte prindërve se aty i shkulnin flokët, i tërhiqnin veshin, e fyenin duke i thënë “debile, kafshë, etj.”. Megjithëse babai i saj ja kishte paraqitur këto fakte të pandehurës, ajo i kishte mohuar faktin që E.K,. të ishte keqtrajtuar në kopsht. Por, duke e parë se gjendja e fëmijës ishte shqetësuese ai e kishte hequr nga kopshti. noa
