Afro 40% e shpenzimeve konsumatorëve të shqiptarëve shkojnë për ushqim. Sipas matjeve më të fundit të Institutit të Statistikave, që i referohen prodhimit kombëtar të vitit 2014, grupi i ushqimeve dhe pijeve zë një peshë gjithnjë e më të lartë në konsumin final të popullsisë, duke arritur në 39.5%, nga 38.8% që zinte në vitin 2013. Grupi i dytë me peshën më të lartë në konsumin vendas zihet nga shpenzimet për energji, ujë, lëndë djegëse dhe qira. Ky grup zë 13.4% të shpenzimeve totale të shqiptarëve. Ndërkohë, grupi i tretë më i madh i shpenzimeve, është ai që përfshin argëtimin dhe kulturën, me 13% të shpenzimeve totale konsumatore. Grupet e tjerë të shpenzimeve zënë një peshë më të ulët, megjithatë nga ecuria e tyre mund të nxirren disa tendenca interesante lidhur me shpenzimet konsumatore. Ndërsa është një fakt i dukshëm përhapja e madhe e biznesit të kafeneve restoranteve dhe hoteleve, shifrat tregojnë se shqiptarët shpenzojnë më pak për to. Kështu, në vitin 2014 vetëm 2.65% e shpenzimeve shkonin për kafene dhe restorante, ndërkohë që në vitin 2010 ky grup zinte rreth 5% të shpenzimeve. Madje, edhe në vlerë absolute, shpenzimet e shqiptarëve për kafene e restorante janë në rënie të vazhdueshme në pesë vitet e fundit. Ky mund të jetë një tregues se kriza ka bërë që shqiptarët të jenë më të kursyer për të shpenzuar para në bare e restorante.
