Ka zgjatur rreth dy orë takimi mes kryeparlamentarit Ilir Meta dhe kreut të PD-së Lulzim Basha, në Hotel “Rogner”.
Kryetari i Parlamentit Ilir Meta dhe kryetari i Partisë Demokratike Lulzim Basha kanë nisur takimin me dyer të mbyllura për të gjetur konsensus sa i përket reformës në drejtësi.
Takimi mes tyre nisi rreth orës 11:10 në Rogner, siç ishte paralajmëruar një ditë më parë. Për ndërmjetësimin e këtij takimi ka ndërhyrë eurodeputeti Eduard Kukan, i cili telefonoi kryeparlamentarin për të bërë të mundur që reforma në drejtësi të miratohet në Parlament edhe me votat e opozitës.
Në këtë takim që cilësohet si shpresa e fundit për kompromis, Meta shoqërohet nga shefi i kabinetit, ndërsa Basha shoqërohet nga Oerd Bylykbashi. Ky takim mes Bashës e Metës përkon edhe me ditëlindjen e kreut të demokratëve, i cili feston sot 42-vjetorin.
Në këtë aspekt, raportohet se Meta e priti Bashën me një tufë me 42 trëndafila blu për t’i uruar ditëlindjen. Salla ku po zhvillohen negociatat është e njëjta ku Lulzim Basha u takua me Sekretarin Amerikan të Shtetit John Kerry kur zhvilloi vizitë zyrtare në Tiranë.