Marrëdhëniet e Beogradit e të Shkupit janë tronditur seriozisht para disa ditësh. Kjo tronditje po vazhdon dhe ka zgjasë të ashpërsohet.
Siç njofton gazeta e Beogradit “Novosti”, shkak për këtë tendosje të re është një mbishkrim në një tabelë në një rrugë në ndërtim e sipër.
Tabela me mbishkrimin “Bivša Jugoslovenska Republika Makedonija – BJRM” (Ish – Republika Jugosllave e Maqedonisë – IRJM) është vendosur para dhjetë ditësh në pjesën e rrugës të sapo hapur të Korridorit 10 te Vladiqin Hani.
Tabela që tregon rrugën e kufirit i ka hidhëruar shumë maqedonasit, të cilët e kanë thirrur urgjentisht për këshillime ambasadoren e Serbisë në Shkup, Dushanka Divjak Tomiq. Ambasadores, me këtë rast, i është bërë demarsh verbal.
Këtë e ka konfirmuar edhe ministri serb i Punëve të Jashtme, Ivica Daçiq, i cili nuk sheh arsye për vërejtjet nga Shkupi.
“Atyre po u pengon kjo tabelë, kurse ne nuk ka pengon pse ata votuan për anëtarësim të Kosovës në UNESCO”, ka thënë Daçiq.
Ai ka shtuar se ambasadorja e Serbisë në Shkup ua ka transmetuar këtë zyrtarëve maqedonas .
Zyrtarët maqedonas kanë thënë se Serbia e ka njohur Maqedoninë me emrin e sasj kushtetues – Republika e Maqedonisë. Për këtë arsye ata kërkojnë që tabela me këtë mbishkrim të hiqet urgjentisht.
Por ministri i Jashtëm serb e kundërshton këtë kategorikisht.
“Tabela me IRJM nuk do të hiqet”, ka thënë ai, duke theksuar se me emrin “Republika e Maqedonisë” Maqedoninë e ka njohur regjimi i Slobodan Milosheviqit.
Por, këto nuk janë shkëndijat e para në marrëdhëniet Serbi-Maqedoni.
Ambasadori maqedonas në Beograd, në vitin 2008, është shpallur “personna non grata” për shkak të njohjes së Kosovës.
Po atë vit, Beogradi i kishte dërguar demarsh Shkupit pas formimit të komisionit të përbashkët të Kosovës e Maqedonisë për shënimin e kufirit ndërmjet dy vendeve.
Në vitin 2006 Shkupi i kishte dërguar notë proteste Beogradit, për shkak të financimit Kishës ortodokse të Argjipeshkvisë së Ohrit nga Qeveria e Serbisë, transmeton Koha.net.
