Ish-Kryeministri Sali Berisha akuzoi sot nga foltorja e Kuvendit ministrin e Punëve të Brendshme, Saimir Tahirin, se ka disponuar informacione se Durim Bami, person i përfolur për çështjen ‘Doshi’, është i dyshuar për vrasjen e bankierit Artan Santo.
Në këto kushte, Berisha pyeti ministrin se pse kur ky i fundit e kishte si të dyshuar për një ndër vrasjet që ka tronditur më së shumti kryeqytetin pse e takoi pak kohë më parë me kërkesë të deputeti shkodran Doshi.
“Ky thotë Bami ishte i dyshuar për vrasjen e Santos. Santo i ka telefonuar para pak çastesh Tahirit. Por më pas e mohoi. Ti e paske ditur që Bami ishte i dyshuar për vrasjen e Santos. Po si mund të takoje ti autorin e vrasjes më të rëndë që ka ndodhur në Tiranë?”, tha Berisha.
Nga ana tjetër, ish-kreu i qeverisë pohoi se Tahiri mohoi faktin se pak para vrasjes së Santos, ky i fundit e kishte telefonuar.
Artan Santo, mbeti i vrarë një vit më parë, në qershor të 2014-ës para zonës së ish-Bllokut në momentin kur po i drejtohej zyrës së bankës që administronte vetë. Edhe pse ka kaluar një vit, vrasja e Santos mbetet ende pa autor.
