Policia e Tiranës ka vënë në pranga mbrëmë pesë punonjës të Bankës së Shqipërisë në vijim të hetimeve për super vjedhjen e këtij institucioni, ndërkohë që një punonjës është shpallur në kërkim. Sipas informacioneve, mësohet se në pranga kanë rënë Petrit Ramohitaj, Liljana Tusha, Lavdim Cani, Myzejen Belba e Dhimitër Davidi, ndërsa i arrestuari është edhe nipi i Ardian Bitrajt, Klevis Bejtaj. Krahas të arrestuarve të djeshëm, për vjedhjen e thesarit janë arrestuar dy punonjësit Ardian Bitraj dhe Mimoza Bruzia, pasi auditi i bankës zbuloi dy skemat e vjedhjes, atë të kartmonedhave që i nënshtrohet procedurës së asgjësimit, si dhe për paratë e vjedhura nga kutitë siç importohen nga Zvicra dhe zëvendësimi i tyre me libra. Vjedhja e bujshme e thesarit të Bankës së Shqipërisë nga dy punonjës të saj u zbardh disa ditë më parë. Dy punonjësit e bankës kanë grabitur një shumë marramendëse prej 713 milionë lekëve nga thesari. Gjykata e Tiranës dha masën e arrestit me burg për dy ekonomistët të arrestuar nën akuzën e shpërdorimit të detyrës dhe moskallëzim krimi. Ardian Bitraj me detyrë përgjegjës i sektorit arkës stok ka rrëfyer se prej katër vitesh në bashkëpunim me kolegen e tij ka nxjerrë nga ky sektor shuma të konsiderueshme lekësh që ishin bërë gati për tu hedhur në qarkullim dhe të tjera që ishin bërë gati për tu asgjësuar.