“Mosmarrëveshjet mes Presidentit dhe qeverisë të zgjidhen në mënyrë ligjore e jo politike. Lufta ndaj korrupsionit, jo përmes akuzave politike dhe shtypit, por përmes sistemit të drejtësisë”
Drejtori për Çështjet e Evropës Jug-Qendrore në Departamentin Amerikan të Shtetit, Jonathan Moore, theksoi rëndësinë që politika shqiptare të gjejë rrugën e bashkëpunimit, duke deklaruar se SHBA është e shqetësuar për polarizimin në Shqipëri. Nga ana tjetër, zyrtari i DASH theksoi nevojën që përplasjet e fundit mes qeverisë shqiptare dhe Presidentit të Republikës të zgjidhen në mënyrë ligjore dhe jo politike. Në një intervistë për “Zërin e Amerikës”, Moore vlerëson faktin që Presidenti Nishani po përdor mekanizmat ligjore për të gjetur zgjidhje për çështjen e kompetencave.
Në vend ka tension gjithsesi mes socialistëve dhe demokratëve. Ndonëse lufta e ashpër politike nuk është në vetvete problematike, ajo bëhet e tillë kur paralizon punën parlamentare dhe sot po shohim ligje të rëndësishme të miratuar vetëm me votat e njërës palë. Cili është mendimi juaj?
Ne jemi të shqetësuar. Jemi të ndërgjegjshëm për polarizimin e situatës në shoqëri, në politikë dhe në shtyp. Por ne kemi besim në aftësinë e popullit shqiptar për të dalluar faktet e vërteta nga ato që i servir politika ose shtypi. Ne duam të shohim përgjegjësi si nga ana e qeverisë, ashtu edhe nga ana e opozitës, të gjejnë fusha ku mund të bashkëpunojnë, në vend të periudhave me pasoja politike si ato kur një numër i madh njerëzish humbasin vendet e punës. Avokati i Popullit, Totozani, më ngriti të njëjtin shqetësim kur e takova, që një numër i madh njerëzish kanë humbur vendet e punës që pas ndryshimit të qeverive. Duhet të ketë bashkëpunim mes tyre. Edhe këtu në Amerikë, ka dallime të mëdha mendimesh, ka njerëz që nuk e pëlqejnë njëri-tjetrin, për shkak të personaliteteve të tyre, por kur flet për çështje politike, ka pika të shumta të përbashkëta dhe kjo është e rëndësishmja.
Një moment tjetër tensionesh janë ato mes qeverisë dhe Presidentit. Zyra e Presidentit e ka akuzuar qeverinë se ajo po përpiqet ta zhveshë atë nga kompetencat. Si e shikoni ju këtë çështje?
Kur isha në Shqipëri para disa javësh, pata mundësi të flisja për këtë çështje me Presidentin, me Kryeministrin, me KRyetarin e Parlamentit dhe me njerëz të tjerë në qeveri. Pikëpamja jonë është që ne duam të shohim që institucionet të funksionojnë normalisht, që populli t’u besojë atyre dhe punës që ato bëjnë. Për disa prej çështjeve që Presidenti ka ngritur ai po përdor mekanizmat e duhur ligjorë, duke iu drejtuar Gjykatës Kushtetuese, siç ishte rasti i shkarkimit të zonjës Xhuka, kryetares së Inspektoratit të Kontrollit të Pasurive. Ky është një hap shumë praktik. Në shumë vende, jo vetëm në Shqipëri, ka situata të ngjashme mosmarrëveshjesh për autoritetin e qeverisë, të kreut të shtetit apo të Parlamentit. Ky është moment i rëndësishëm si për Presidentin edhe për Kryeministrin dhe rezultatet e punës së tyre do të tregojnë se sa e suksesshme është demokracia shqiptare. Presidenti përfaqëson gjithë vendin, Kryeministri ka përgjegjësi për të gjithë vendin, kjo duhet të jetë temë debati publik dhe nëse ka mosmarrëveshje, ato duhen zgjidhur në mënyrë ligjore dhe jo politike.
Një nga problemet më të mëdha të shoqërisë shqiptare, të institucioneve të vendit është korrupsioni dhe dobësitë e sistemit të drejtësisë. Qeveria premtoi luftë të fortë ndaj korrupsionit. A ka qenë ajo e suksesshme deri tani?
Ka probleme korrupsioni në gjithë rajonin. Nuk mund të them që nuk ka korrupsion në Amerikë. Ky është një problem që qeveria e mëparshme dhe kjo e tanishmja janë zotuar ta luftojnë. Ata kanë qenë në pushtet për vetëm 8 muaj. Një nga elementët kryesorë të luftës kundër korrupsionit është goditja e tij me sukses, jo vetëm me fjalë, për këtë duhet të përdoret prokurori i Përgjithshëm Adriatik Llalla. Nëse ka fakte ndaj zyrtarëve në qeveri apo në nivel lokal ose ndaj gjykatësve, ato duhet të hetohen dhe t’u kalojnë rrugëve ligjore, Prokurorisë dhe të mos bëhen përmes të ashtuquajturit “gjyq publik”, përmes shtypit apo përmes politikanëve që akuzojnë paraardhësit e tyre. Këto raste duhet të zgjidhen përmes sistemit të drejtësisë. Është e vërtetë që ka korrupsion në Shqipëri, edhe mes disa gjykatësve, por po ashtu ka edhe gjyqtarë shumë të mirë, të aftë, me të cilët ne bashkëpunojmë gjithmonë, që i trajnojmë, tani sapo kishim këtu për shembull kryetarin e Gjykatës së Tiranës, zotin Islamaj. Ka shumë të tjerë në sistemin e drejtësisë dhe në Prokurori tek të cilët ne kemi besim në Shqipëri.
