Gëzim Saliu
Kodi i ri përcakton se nëse mandati dorëzohet nga një femër duhet të zëvendësohet në listën e kandidatëve po nga një femër dhe e njëjta procedurë ndiqet edhe për një kandidat të gjinisë mashkullore
Dorëzimi i mandatit të deputetit nga ana e ministrave të zgjedhur nga kreu i koalicionit fitues në zgjedhjet e 23 qershorit Edi Rama për t’u bërë pjesë e kabinetit të ri qeveritar bën të mundur përfshirjen e 16 emrave të rinj në Kuvendin e Shqipërisë. 12 deputetë aktualë të Partisë Socialiste dhe 4 të Lëvizjes Socialiste për Integrim do të lënë mandatin e tyre dhe do të zëvendësohen. Por ajo që vihet re në këtë ndryshim që do të pësojë Kuvendi i ri, i cili pritet të nisë punimet me betimin e qeverisë së re në fillim të muajit shtator, është fakti se zëvendësimi i deputetëve të dorëhequr nuk bëhet në bazë të pasuesit të listës së kandidatëve. Kodi i ri Zgjedhor, përkatësisht neni 164 pika 2, thekson se nëse do të jetë një femër që do të dorëzojë mandatin e deputetit, atëherë ajo duhet të zëvendësohet po nga një femër dhe jo nga kandidati pasues në listë. E njëjta praktikë ndodh edhe në rast se mandatin e dorëzon një deputet, gjë kjo që sjell kapërcime të listës së kandidatëve të partive.
Emrat e rinj
Tirana do të jetë qarku ku do të ketë më shumë ndryshime, nisur nga fakti se 4 deputetë të Partisë Socialiste dhe 1 nga LSI do të duhet të dorëzojnë mandatin e deputetit. Kështu nga Partia Socialiste do të heqin dorë nga mandati i deputetit Saimir Tahiri, Lindita Nikolli, Milena Harito dhe Ditmir Bushati. Në bazë të Kodit Zgjedhor në Kuvend këto deputetë do të zëvendësohen nga Ervin Bushati, Enkelejda Shkreli, Blerina Gjylameti dhe Bledar Doracaj. Ndërkohë që tek lëvizjet në LSI vihet re një fakt interesant, pasi me dorëzimin e mandatit nga Klajda Gjosha në bazë të Kodit Zgjedhor vendin e saj në Kuvend do të zërë 20-vjeçarja Kejdi Mehmetaj, aktualisht nënkryetare e LRI-së. E datëlindjes 1993, Mehmetaj pritet të jetë deputetja më e re në historinë e parlamentarizmit shqiptar. Ndërkohë, edhe në qarkun e Fierit lëvizin dy deputetë të PS-së, pasi me dorëzimin e mandatit nga Eglantina Gjermeni dhe Ilirjan Celibashi në Kuvend do të përfshihen Adelina Rista dhe Anduel Xhindi. Po ashtu edhe në qarkun e Gjirokastrës do të kemi dy zëvendësime, përkatësisht heqin dorë nga mandati Arben Ahmetaj dhe Erjon Veliaj dhe në vend të tyre vijnë Vladimir Kosta dhe Dashamir Kamberi. Ndërkohë, në qarkun e Durrësit ndodhin zëvendësime nga të dy aleatët e koalicionit të majtë. Lefter Koka i LSI-së dorëzon mandatin dhe zëvendësohet nga Bujar Derveni e po ashtu Ilir Beqja, të cilit i zë vendin Shkëlqim Troplini. Në Elbasan për partinë Socialiste Damian Gjiknuri do të zëvendësohet me Arben Kamamin dhe e ndërsa për LSI-në Edmond Haxhinasto do të zëvendësohet nga Shkëlqim Elezi. Nga ana tjetër në Dibër, ministri i ardhshëm i Financave Shkëlqim Cani do të zëvendësohet nga Hasan Ceni dhe në Berat, Nasip Naço i LSI-së do të dorëzojë mandatin e deputetit dhe në vend të tij do të vijë Selfo Kapllani.
Zëvendësimet e deputetëve
Partia Socialiste
Tiranë
Dorëzon mandatin – Saimir Tahiri, Lindita Nikolli, Milena Harito dhe Ditmir Bushati
Zëvendësohen nga – Ervin Bushati, Enkelejda Shkreli, Blerina Gjylameti dhe Bledar Doracaj
Fier
Dorëzon mandatin – Eglantina Gjermeni dhe Ilirjan Celibashi
Zëvendësohen nga – Adelina Rista dhe Anduel Xhindi
Lezhë
Dorëzon mandatin – Mimi Kodheli
Zëvendësohet nga – Mejreme Delishi
Dibër
Dorëzon mandatin – Shkëlqim Cani
Zëvendësohet nga – Hasan Ceni
Durrës
Dorëzon mandatin – Ilir Beqja
Zëvendësohet nga – Shkëlqim Troplini
Elbasan
Dorëzon mandatin – Damian Gjiknuri
Zëvendësohet nga – Arben Kamami
Gjirokastër
Dorëzon mandatin – Arben Ahmetaj dhe Erjon Veliaj
Zëvendësohen nga – Vladimir Kosta dhe Dashamir Kamberi
Lëvizja Socialiste për Integrim
Tiranë
Dorëzon mandatin Klajda Gjosha
Zëvendësohet nga – Kejdi Mehmetaj
Elbasan
Dorëzon mandatin – Edmond Haxhinasto
Zëvendësohet nga – Shkëlqim Elezi
Dorëzon mandatin – Lefter Koka
Zëvendësohet nga – Bujar Derveni
Berat
Dorëzon mandatin – Nasip Naço
Zëvendësohet nga – Selfo Kapllani
Neni 164 pika 2 e Kodit Zgjedhor (ndryshuar me ligjin nr. 74/2012)
Ndërprerja e mandatit dhe zëvendësimi i vakancës
2. Mandati i ndërprerë i kalon kandidatit vijues të listës së të njëjtës parti politike në zonën zgjedhore përkatëse. Në përjashtim nga ky rregull, kur vakanca i përket një mandati të fituar sipas pikës 6 të nenit 67, ajo plotësohet nga kandidati i parë në listë i gjinisë përkatëse, pavarësisht renditjes në listë.
Qeveria e re
Kryeministër
Edi Rama
Zv.kryeministër
Niko Peleshi
1. Ministër i Financave
Shkëlqim Cani
2. Ministër i Brendshëm
Saimir Tahiri
3. Ministre e Mbrojtjes
Mimi Kodheli
4. Ministër i Jashtëm
Ditmir Bushati
5. Ministre e Integrimit Evropian
Klajda Gjosha
6. Ministër i Drejtësisë
Nasip Naço
7. Ministër i Zhvillimit Ekonomik, Tregtisë dhe Sipërmarrjes
Arben Ahmetaj
8. Ministër i Energjisë dhe Industrisë
Damian Gjiknuri
9. Ministër i Transportit dhe Infrastrukturës
Edmond Haxhinasto
10. Ministre e Zhvillimit Urban dhe Turizmit
Eglantina Gjermeni
11. Ministër i Bujqësisë, Zhvillimit Rural dhe Administrimit te Ujërave
Edmond Panariti
12. Ministër i Shëndetësisë
Ilir Beqaj
13. Ministre e Arsimit dhe Sportit
Lindita Nikolli
14. Ministër i Mirëqenies Sociale dhe Rinisë
Erion Veliaj
15. Ministre e Kulturës
Mirela Kumbaro – Furxhiu
16. Ministër i Mjedisit
Lefter Koka
17. Ministër për Marrëdhëniet me Parlamentin
Ilirian Celibashi
18. Ministre për Inovacionin dhe Administratën Publike
Milena Harito
19. Ministër për Çështjet Vendore
Bled Çuçi
OMONIA: Qeveria e re nuk ka ministër minoritar, PBDNJ të rishikojë orientimin politik
Pas publikimit të emrave të ministrave të rinj nga kreu socialist Edi Rama ka reaguar dje organizata OMONIA, e cila kritikon mos përfshirjen e PBDNJ-së në qeverinë e re dhe i kërkon partisë së Dules të rishikojë qëndrimin e saj me PS-në. “Mospërfshirja në mënyrë të drejtpërdrejtë në përbërjen e qeverisë me post ministri, të një pjesëtari të komunitetit etnik grek ndonëse kjo përbën praktikë që nga kalimi normal në demokraci më 1991, për më tepër të propozuar drejtpërdrejt nga Bashkimi për të Drejtat e Njeriut – PBDNJ, është një ogur jo pozitiv. Rezervat tona politike lidhen sigurisht me faktin se sa dhe si forcat që po ndërmarrin qeverisjen e re kanë vullnetin dhe do të punojnë për avancimin e mëtejshëm të të drejtave të minoritetit etnik grek. Kjo në përputhje dhe sipas standardeve të BE kundrejt të cilit dhe procedurave të përafrimit të mëtejshëm integrues në të, qeveria shqiptare është e angazhuar. Zhvillimet e ditës së sotme, sidoqoftë, ngrenë pikëpyetje serioze dhe hedhin hije mosbesimi. Përpos këtyre ne si OMONIA i drejtojmë apel Bashkimit për të Drejtat e Njeriut – PBDNJ të riorientojë qëndrimin e tij politik në bazë të zhvillimeve të sotme. Nuk bëhet fjalë për interes mikropolitik por për çështje parimore që lidhen drejtpërdrejt me terrenin sensibël të pozicionit të MEG”, – theksohej në deklaratën e organizatës OMONIA.
Peleshi si zv.kryeministër
Zgjedhje të reja në Bashkinë e Korçës
Pas propozimit të bërë nga Kryeministri i ardhshëm Edi Rama për të qenë zëvendëskryeministër, Niko Peleshi duhet të japë dorëheqjen nga posti i kryetarit të Bashkisë së Korçës, të cilin e mban prej vitit 2007. Kjo dorëheqje e Peleshit do të sjellë ribërjen e zgjedhjeve në këtë qytet. Referuar ligjit, zgjedhjet mbahen jo më vonë se 45 ditë nga deklarimi i vendit vakant, i cili mësohet se do të shpallet ditën që Niko Peleshi do të betohet si zëvendëskryeministër i Shqipërisë.