Felix Steiner
Për herë të pestë radhazi, Angela Merkel kurorëzohet gruaja më e pushtetshme në botë. Felix Steiner gëzohet për këtë, por shtron pyetjen mos vallë do të kishte qenë më interesant klasifikimi i të apasionuarve pas peshkut?
Nëse revista “Forbes” nuk do të përzgjidhte 100 gratë më të pushtetshme në botë por 100 personat që preferojnë peshkun – atëherë Angela Merkel padyshim që edhe në këtë klasifikim do të kishte zënë vendin e parë. E me gjasë ajo do ta ruante këtë pozicion edhe vitin e ardhshëm. Sepse humbjen e mundshme të kurorës si gruaja më e pushtetshme në botë “Forbes” ndërkohë e ka anonçuar. Angela Merkel megjithatë edhe pas këtij paralajmërimi tragjik me siguri që e ka bërë gjumin rehat. E është pikërisht kjo çfarë vlerësojmë kaq shumë ne gjermanët tek Kancelarja jonë: qetësinë e maturinë, me të cilën ajo i trajton problemet dhe krizat më të vështira.
Kolapsi i vitit 2008 në tregjet e financave, kriza e Euros, përhapja e “Shtetit Islamik”, Vladimir Putin dhe Ukraina. Përveç kësaj ish-konkurrentët në partinë e saj Friedrich Merz e Roland Koch (a ju kujtohen më këta emra?), Horst Seehofer (kryetar i CSU-së) e Sigmar Gabriel (kryetar i SPD-së). Angela Merkel i menaxhon të gjitha. E meqenëse kjo e bën atë aq të suksesshme, ajo me siguri do të vazhdojë të veprojë kështu edhe përtej zgjedhjeve të ardhshme. Madje në partinë socialdemokrate (SPD) tani po shtrohet pyetja, se kush do të jetë ai që do t’i humbasë zgjedhjet ndaj Angela Merkelit në vitin 2017.
Kancelarja – një peshk i vogël
Por nëse së shpejti do të jetë Hillary Clinton që do të kurorëzohet në vendin e parë si gruaja më e pushtetshme në botë dhe Merkeli do të zbresë në pozicion të dytë, atëherë del fare qartë në pah, që kjo s’ka të bëjë me aftësitë individuale të tyre, por vetëm me postin që ato mbajnë. Kësisoj kundrejt Presidentes së SHBA-së Kancelarja është tek e fundit vetëm një peshk i vogël. E meqenëse ra fjala, e njëjta gjë do të vlente edhe për burrat në këto dy poste.
E pra në fund të fundit bëhet fjalë vetëm për klasifikimin e posteve. Gjermania – edhe pse në krahasim më e vogël – është më e pushtetshme se Brazili! Kjo e kënaq shpirtin gjerman. E në parametrat global ajo vazhdon të jetë edhe më e rëndësishme se Yutube e Facebook! Edhe ky është një mesazh qetësues. A do të mund t’ia dilte Angela Merkel të zinte vendin e parë, nëse tek Google CEU (Chief Executive Officer) do të ishte një grua? Pra lista “Forbes” në radhë të parë jep vetëm një paqsqyrë të përgjithshme, se cilat nga pozicionet më me influencë në mbarë botën mbulohen nga gra. Ndërkohë është arritur një numër i konsiderueshëm, por sidoqoftë grave ende nuk u takon “gjysma e rruzullit”. Madje kjo nuk do të arrihet as sikur Hillary Clinton të zgjidhet Presidente e SHBA-së. Ky do të ishte vetëm një post më shumë – edhe pse me sa duket posti më me influencë në botë.
Kush është më i fuqishëm – peshku apo peshkatari?
Por ku konsiston influenca e pushtetit sipas parametrave globalë? Ka shumë paqartësi në këtë mes. Artikulli shpjegues në revistën “Forbes” mbi kriteret e klasifikimit gjithsesi nuk e zgjidh këtë enigmë. Lista kurrsesi nuk është e saktë në aspektin shkencor dhe aspak objektive, ndaj përmbajtja e informacionit të saj është e kufizuar. Por atëherë përse e bëjnë gazetarët një gjë të tillë? Sepse gazetaria nuk duhet vetëm të informojë, por edhe të argëtojë. Klikimet në galeritë fotografike apo kronikat në mediet gjermane online janë dëshmi, që publiku i preferon të tilla klasifikime. Sepse njerëzit vërtetë nuk duan të lexojnë vetëm për katastrofa, luftëra e terrorizëm. E për këtë arsye ne gazetarët “i shtojmë edhe më ujë e miell” brumit. (ky është zhargoni i gazetarëve, kur shkruajnë artikuj shtesë për ngjarjet e një dite më parë)
Është e vërtetë: që megjithatë lista aktuale “Forbes” i përkëdhel sedrën Angela Merkelit e po ashtu edhe ne gjermanëve. Por në thelb ajo nuk thotë asgjë. Ndaj po kaq mirë do të ishte sikur “Forbes” të përpilonte edhe një listë për të apasionuarit më me influencë të peshkut. Në varësi të kritereve të përzgjedhjes lufta për vendin e parë do të kishte qenë ndoshta mjaft interesante. Galeria shoqëruese fotografike do të tërhiqte klikime në masë!
