Feriz Bardhi, 40 vjeçari, u ekzekutua tri ditë më parë në hyrje të banesës së tij në Durrës, nga persona ende të panjohur.
Dyshohet se Bardhi me origjinë nga Tropoja u ekzekutua nga vrasës të porositur jashtë Shqipërisë, kjo duket se është edhe pista kryesore ku Prokuroria e Durrësit po heton mbi vrasjen.
Kjo pistë përforcohet edhe më shumë pasi mësohet se viktima kishte konflikte të hapura në Itali, ku thuhet se ishte i përfshirë në grupe kriminale që ushtrojnë aktivitetin e trafikimit të drogës. Ai lëvizte me makinë të blinduar.
Gjë me sa duket ishte pikasur edhe nga autorët, të cilët vendosën ta godisnin në mes të ditës, në derën e vilës së tij që kishte blerë së fundmi në lagjen nr.18 në Durrës.
Sipas burimeve hetimore, Bardhi ishte i përfshirë në trafikimin e kokainës në Itali dhe kishte krijuar përplasje dhe konflikte me trafikantët atje.
