Nuri/ Shpopullimi vazhdon: ikin Shqiptarët, vijnë Vietnamezët
Sekretari për të Drejtat e Njeriut në Partinë Demokratike, Franci Nuri ka komentuar vizitën e delegacionit shqiptar në Vietnam dhe nënshkrimit të një marrëveshjeje për sjelljen e punëtorëve vietnamezë në Shqipëri.
Në një reagim në rrjetet sociale, Nuri akuzon qeverinë se po përpiqet të mbulojë dështimin e politikave të saj me importin e fuqisë punëtore nga jashtë, ndërsa vendi vijon të zbrazet nga të rinjtë dhe punëtorët shqiptarë.
Ai shton se problemi nuk është mungesa e punëtorëve, por largimi masiv i shqiptarëve për shkak të pagave të ulëta, kostos së lartë të jetesës dhe mungesës së perspektivës në vend.
Postimi i Nurit:
Fotografia e delegacionit shqiptar në Vietnam duket sikur vjen nga një kohë tjetër.
Në sfond janë drapri dhe çekani, ylli i kuq dhe busti i Ho Chi Minh-it. Përballë këtyre simboleve, ministrja shqiptare firmos marrëveshjen për sjelljen e punëtorëve vietnamezë në Shqipëri.
Prindërit tanë i mbajnë mend mirë paradat e 1 Majit dhe thirrjet e propagandës komuniste:
“Rroftë Vietnami!”
“Vietnami do të fitojë!”
Atëherë bëhej fjalë për luftën në Vietnam. Sot, pas më shumë se gjysmë shekulli, pasardhësit politikë të PPSH-së shkojnë në Vietnam për të kërkuar punëtorë, sepse Shqipërinë e kanë zbrazur nga shqiptarët.
Shqiptarët nuk u zhdukën. Ata u larguan
Qeveria thotë se vendi ka mungesë fuqie punëtore. Por nuk na tregon pse mungojnë punëtorët shqiptarë.
Ata nuk humbën dëshirën për të punuar. U larguan sepse pagat janë të ulëta, jetesa është e shtrenjtë, puna është e pasigurt dhe shpresa për të ardhmen është vrarë.
Fshatrat janë zbrazur. Tokat kanë mbetur djerrë. Qytetet e vogla po shuhen. Të rinjtë largohen sapo mbarojnë shkollën, ndërsa Tirana është kthyer në një fjetore gjigante betoni, ku është përqendruar pothuajse gjithçka.
Kjo nuk është fatkeqësi natyrore. Është rezultat i politikave të një qeverie që e ka bërë Shqipërinë vend të vështirë për shqiptarët.
Tani kërkojnë punëtorë në anën tjetër të botës
Në bujqësi nuk ka më njerëz. Në turizëm, hoteleri dhe restorante po punësohen gjithnjë e më shumë të huaj. Në ndërtim, peshkim dhe industri kanë ardhur prej kohësh punëtorë nga vende të Afrikës dhe Azisë.
Tani qeveria mburret se do të sjellë mijëra punëtorë edhe nga Vietnami.
Por pyetja është e thjeshtë:
Si arriti Shqipëria në këtë pikë?
Si mundet që një vend me kaq shumë qytetarë në emigracion të kërkojë dhjetëra mijëra punëtorë jashtë, në vend që të krijojë kushtet që shqiptarët të qëndrojnë dhe emigrantët të kthehen?
Përgjigjja është e dhimbshme: modeli ekonomik i kësaj qeverie nuk është ndërtuar për familjen shqiptare. Është ndërtuar për punë të lirë, paga të ulëta dhe fitime të shpejta për një grusht njerëzish pranë pushtetit.
Ne nuk jemi kundër të huajve
Punëtorët vietnamezë, indianë, filipinezë, egjiptianë apo afrikanë nuk janë armiqtë tanë. Ata kërkojnë një punë dhe një jetë më të mirë, ashtu si miliona shqiptarë në emigracion.
Por ata nuk mund të sillen në Shqipëri si fuqi e lirë pune, të vendosen në kushte të këqija dhe të detyrohen të punojnë me orare të zgjatura vetëm sepse janë më të pambrojtur. Shteti duhet t’u garantojë pagë, kontratë, sigurime dhe kushte dinjitoze. Përndryshe, nuk kemi zhvillim, por shfrytëzim.
Problemi i vërtetë është qeveria që po përdor punëtorët e huaj për të mbuluar dështimin e saj me shpopullimin.
Në vend që të pyesë si të rrisë pagat, si të mbështesë familjet, si të zhvillojë fshatin dhe qytetet e vogla, ajo pyet vetëm:
Ku mund të gjejmë njerëz që pranojnë të punojnë më lirë?
Rreziku i zëvendësimit të shqiptarëve
Kur kompanive u ofrohet vazhdimisht fuqi punëtore më e lirë nga jashtë, ato kanë gjithnjë e më pak arsye të rrisin pagat dhe të përmirësojnë kushtet për shqiptarët.
Kështu krijohet një rreth i mbyllur:
Shqiptarët largohen sepse nuk jetojnë dot me pagat e vendit. Qeveria sjell punëtorë më të lirë nga jashtë. Pagat mbeten të ulëta. Edhe më shumë shqiptarë largohen.
Ky nuk është thjesht emigracion ekonomik. Është zëvendësim gradual i popullsisë aktive shqiptare me fuqi pune të importuar.
Ne jemi kundër çdo urrejtjeje ndaj të huajve. Por jemi po aq kundër një politike që e boshatis Shqipërinë nga shqiptarët dhe më pas e paraqet këtë si sukses ekonomik.
Qëndrimi i Partisë Demokratike duhet të jetë i qartë
Partia Demokratike është parti konservatore.
Ne jemi parti e familjes, e pronës, e punës, e traditës dhe e interesit kombëtar. Ne besojmë se detyra e parë e shtetit shqiptar është të mbrojë shqiptarët dhe t’u krijojë atyre mundësinë të ndërtojnë jetën në vendin e tyre.
Ne jemi:
Pro familjes shqiptare.
Pro të rinjve shqiptarë.
Pro pagave dinjitoze.
Pro bujqësisë dhe prodhimit vendas.
Pro kthimit të emigrantëve.
Pro zhvillimit të çdo qyteti dhe fshati.
Dhe jemi kundër një modeli që i dëbon shqiptarët, shkatërron familjen, zbraz vendin dhe më pas importon fuqi të lirë pune për të mbajtur në këmbë ekonominë e klientëve të qeverisë.
Një qeveri kombëtare fillimisht pyet pse po largohen qytetarët e saj. Rrit pagat, mbështet familjet e reja, ndihmon fermerët, zhvillon arsimin profesional dhe krijon vende pune të sigurta.
Vetëm pasi të ketë bërë këto, mund të flasë për nevoja të veçanta për punëtorë të huaj.
Po Shqipëria, kur do të fitojë?
Drapri dhe çekani në sfond nuk janë vetëm simbole të një salle vietnameze. Për shqiptarët, ato kujtojnë një regjim që për dekada premtoi mirëqenie, por la pas varfëri, izolim dhe ikje masive.
Sot pasardhësit politikë të atij regjimi thonë se Shqipëria po zhvillohet, ndërsa shkojnë në Vietnam për të kërkuar njerëz që të zëvendësojnë shqiptarët e larguar.
Dikur bërtisnin:
“Vietnami do të fitojë!”
Sot pyetja jonë është:
Po Shqipëria dhe shqiptarët, kur do të fitojnë?
