Vrasja e 49-vjeçarit, Pëllumb Meta, në fshatin Shënavlash të Durrësit, vijon të jetë në sitën e hetimeve teksa detaje të reja dalin në dritë.
Nga hetimet e deritanishme rezulton se vrasja është kryer në bashkëpunim nga tre fëmijët e tij, Hysen Meta 24 vjeç, Amarildo Meta 22 vjeç dhe Hygerta Meta 19 vjeç.
Kjo e fundit në dëshmitë e saj të dhënë para grupit hetimor ka treguar dy versione të ndryshme sa i takon implikimit të nënës së saj në ngjarje.
Në një nga dëshmitë e saj, në dosjet e prokurorisë thuhet se e ëma, kur ka ardhur në banesë ka ngelur e tronditur nga ajo që kishin bërë fëmijët.
“Kur mami u thye në shtëpi u trondit nga ajo që kishim bërë. Të dyja qëndruam në shtëpi dhe pastruam vendin dhe divanin nga gjaku, aty ku vëllai qëlloi babi. Ne e ngjitëm divanin në kat të dyte, ndërsa dy vëllezërit u morën me groposjen e trupit”.
Kjo dëshmi e dhënë më herët, është pasuar nga një tjetër dëshmi, ku tregon se e ëma a mësuar këtë të vërtetë vetëm pasi e ka zbuluar policia.
“Mami ka dalë pasdreke pasi merrej me punët e bujqësisë. Kur erdhi ajo nuk vuri re asgjë. Nuk u shqetësua për mungesën e babit, pasi mendoj që ka dalë për punë”, thuhet në një tjetër deklaratë të dhënë nga Hygerta Meta, duke shfajësuar në këtë mënyrë të ëmën si personi tjetër që kishte dijeni mbi krimin e kryer.
Sakaq versioni që vrasja ka ndodhur për shkak të një fejese të padëshiruar nga vajza, Hygerta Meta është rrëzuar prej familjes ku mendohej se do të fejohej vajza 19-vjeçare.
Nga ana tjetër Blerina Meta, nëna e tre fëmijëve të arrestuar, vendndodhja e të cilës mbahet sekret për shkak të sigurisë, ndodhet nën hetim në gjendje të lirë e dyshuar se kreu veprime që pengojnë zbulimin e së vërtetës. Blerina Meta vazhdon të mohojëqë ishte në dijeni të ngjarjes.
Sakaq ditën e nesërme tre fëmijët e familjes Meta, do të dalin para gjykatës për caktimin e masë së sigurisë
Ndaj tyre rëndojnë akuzat e “Vrasjes për rrethana familjare në bashkëpunim” si dhe “mos kallëzim krimi”.
