Këshilltarja e PD-së në Këshillin Bashkiak të Tiranës, znj. Ilda Zhulali, e ka akuzuar drejtpërsëdrejti sot kryebashkiakun Erion Veliaj se e mban të gjithë pushtetin e tij vetëm nga paratë e krimit, vetëm nga paratë e betonit. “Po t’ia heqësh Erion Velisë këtë mekanizëm, ai është një asgjë,” tha znj. Zhulali gjatë një konference të përbashkët shtypi me këshilltarët e tjerë të opozitës.
“Ne dje kishim mbledhjen e fundit të Këshillit Bashkiak të Tiranës dhe çfarë të themi?! – tha Zhulali. – Mund të themi që përfundimisht në këtë qytet mbretëron paturpësia sepse këtë qytet e përfaqëson paturpësia. Kryetari i bashkisë, që ka paturpësinë që të pohojë publikisht se ka mbjellë 1 milion pemë në këtë vend, që paturpësisht e ka betonizuar Tiranën në çdo cep dhe në çdo skaj të saj, që paturpësisht refuzon të bëjë transparencë për qytetarët se si e ka shndërruar Tiranën në krematorium me nivele alarmante të ajrit të ndotur dhe të gjitha këto përpiqet që t’i censurojë në mënyrë të pashembullt, na japin një panoramë që e kemi parë edhe në Kuvendin e Shqipërisë, e shikojmë dhe në çdo institucion tjetër në Shqipëri. Çfarë shikojmë është mungesë totale e përgjegjësisë , të llogaridhënies dhe pse bëhet kjo?! Vetëm për një arsye: për të shmangur kontrollin
Me një gërvishje të vogël, me një kontroll sipërfaqësor, mund të shikosh që kjo qeverisje edhe në nivel qendror edhe në nivel lokal është e zhytur në korrupsion dhe krim.
Cili është vizioni i Erion Velisë për Tiranën?! Vizioni i tij është shumë i thjeshtë, ta kthejë Tiranën në një fjetore, në një gjellëtore dhe në një gropë të krimit. e ka bënë qytetin në shërbim të pastrimit të parave. Pse?!
Jo thjesht për të shkatërruar fizionominë e qytetit dhe trashëgiminë e tij kulturore, jo thjesht infrastrukturën e nevojshme që duhet të jetë në shërbim të qytetarëve dhe jo të ndërtesave, por sepse e mban të gjithë pushtetin e tij vetëm nga paratë e krimit, vetëm nga paratë e betonit. Po t’ia heqësh Erion Velisë këtë mekanizëm, ai është një asgjë.”
