Pas deklaratave të kryeministrit Rama në emisionin “Opinion”, ku pasi foli për operacion të pamëshirshëm në drejtësi tha se ka gjyqtarë maskarenj dhe gjykata gagarelë, reagoi dje Unioni i Gjyqtarëve të Shqipërisë.
Duke deklaruar se distancohet me forcë nga fenomen antiligjor, Unioni deklaroi se kreu i qeverisë duhet të ndalë sulmet përgjithësuese ndaj gjyqtarëve. “Me keqardhje të thellë konstatojmë se, kohët e fundit përfaqësues të lartë të politikës po bëjnë deklarata dhe ndërmarrin veprime, të përsëritura, duke anatemuar në mënyrë të përgjithshme dhe pa dallim gjithë gjyqtarët dhe sistemin e drejtësisë në përgjithësi.
Unioni i Gjyqtarëve të Shqipërisë shpreh shqetësimin e tij të thellë për këtë fenomen dhe bën thirrje për ndaljen e tij pasi, nuk ndihmon në rritjen e besimit të publikut tek sistemi gjyqësor, forcimin e pavarësisë së vendim-marrjes së gjykatave dhe forcimin e parimeve themelore të funksionimit të shtetit ligjor dhe demokracisë ne vend”- thuhej në deklaratën e Unionit. Pak ditë më parë në një intervistë, kreu i qeverisë deklaroi se,: “Ata maskarenj që kanë përdorur togën e zezë për t’u bërë palë me krimin, do e shohin se çfarë i pret.
Në vjeshtë, Parlamenti do të kalojë reformën më të thellë në Shqipëri. Gjykatat tona janë kthyer në gagarele dhe ne do ta tundim nga themelet sistemin e drejtësisë në Shqipëri”.
