Ka shkaktuar reagime dhe debate të shumta një vendim i papritur i Drejtorisë së Përgjithshme të Transportit Rrugor për dyfishuar çmimin e pajisjes me leje të drejtimit të automjeteve. Për të justifikuar këtë rritje të fortë të çmimit, drejtori i këtij institucioni Blendi Gonxhe është shprehur se vendimi ka për qëllim të unifikojë tarifat, të zgjasë kohën e përgatitjes teorike dhe praktike dhe sipas tij të luftojë informalitetin. Është e vështirë të kuptosh për momentin arsyet e vërteta të këtij vendimi që ka marrë ky institucion, por ajo që ka shkaktuar habi është rritja kaq e fortë e çmimit. Me këtë vendim Shqipëria bëhet vendi që e ka më të shtrenjtë marrjen e një leje drejtimi automjetesh në gjithë rajonin e Ballkanit Perëndimor.
Lapsi.al bëri një vëzhgim të tarifave për pajisjen me një patentë në vendet e rajonit. Çmimi mesatar i të gjitha vendeve është rreth 600 euro (690 lekë) ndërsa në Shqipëri çmimi minimal i propozuar është 850 mijë lekë (750 euro) për një patentë të tipit B. Nga ky vëzhgim shihet se ka pasur një rritje të lehtë tarifash në disa vende vitin e kaluar, por vetëm pjesa e praktikës, si kompensim për shkak të rritjes galoponte të çmimit të karburantit që ndodhi pas luftës në Ukrainë.
Kosovë
Në Kosovën fqinje autoshkollat kryejnë një trajnim bazë në teori dhe praktikë për shoferët me 20 orë praktike që kushtojnë 200 euro deri maksimumi 300 euro (345 mijë lekë). Edhe me rritjen e pësuar vitin e kaluar sërish Kosova ka tarifën më të ulët në të gjithë Ballkanin. Duhet thënë se vendi fqinj ka edhe numrin më të ulët të orëve praktike përpara daljes në testim.
Maqedonia e Veriut
Sipas një studimi që bëri një vit më parë TRT Ballkan, autoshkollat në Maqedoninë e Veriut kërkojnë deri në 400 euro (460 mijë lekë) për paketën bazë të mësimit teorik dhe praktik për kategorinë B. Në këtë vend disa autoshkolla ofrojnë zbritje për aplikantët e mundshëm. Vitin e kaluar edhe aty pati një rritje të lehtë të çmimeve për shkak të krizës që përfshiu Europën.
Serbia
Serbia është një nga vendet e rajonit që ka çmimet më të larta të marrjes së patentës, por sërish nuk e kalon Shqipërinë. Kostoja për trajnimin e plotë të një shoferi të ri në teori dhe praktikë është rreth 630 euro (725 mijë lekë). Disa prej autoshkollave ofrojnë mbulimin e provimit teorik dhe praktik me një testim dhe disa të tjera mbulojnë edhe certifikatën mjekësore.
Bosnje e Hercegovina
Në Bosnje Hercegovinë çmimi varion nga 500 në 600 euro për mësimin teorik, trajnimin praktik, testin teorik, ndihmën e parë dhe testin e drejtimit. Autoritetet atje kanë vendosur një çmim minimal mbrojtës për autoshkollat. Megjithatë në pjesë të caktuara të vendit nevojiten vetëm 255 euro për të marrë patentën nëse kandidati i kalon të gjitha provimet “me të parën”.
Mali i Zi
Mali i Zi konsiderohet si një nga vendet më të vështira në botë dhe i treti në Evropë për marrjen e patentës së shoferit. Atje ka koston më të ulët për marrjen e patentës që shkon nga 230 në 290 euro, por qytetarët e kanë shumë të vështirë ta marrin menjëherë për shkak të rregullave mjaft strikte. Ndaj shumë praktikantë detyrohen të kryejnë praktikë shtesë për të mos gabuar në provim. ©LAPSI.al
Çmimet e patentave në rajon
Mali i Zi – 290 euro (330 mijë lekë)
Kosovë – 300 euro (345 mijë lekë)
Maqedoni e Veriut – 400 euro (460 mije lekë)
Bosnje Hercegovinë – 550 euro (630 mijë lekë)
Serbi – 630 euro (725 mijë lekë)
Shqipëri – 740 euro (850 mijë lekë)
