Faik KRASNIQI
Puna e kësaj Qeverie, përveç premtimeve të vazhdueshme se do të realizojnë shumë nga premtimet që kanë dhënë, në përgjithësi ka qenë shumë e zbehtë dhe jo shpresëdhënëse. Kjo edhe për faktin e
keqqeverisjes 16-vjeçare dhe bashkëqeverisjes me PDK-në, e cila është edhe fajtorja kryesore për gjendjen e rëndë ekonomike dhe gjendjes në përgjithësi.
Qeveria pa vullnet për ndryshimin e gjendjes
Përmes opinioneve dhe prononcimeve, kam dhënë shumë rekomandime dhe sugjerime për Qeverinë, por deri më tash asnjë nga ato rekomandime nuk është realizuar! Dhe një nga rekomandimet ka qenë që me ligj të ndalohet marrja e më shumë se një page, sepse këta
”supermenë” kanë uzurpuar mbi 15 mijë vende pune, kurse në anën tjetër kemi më shumë se gjysmën e popullatës të papunë. Por, as kjo gjë nuk ndodhi, edhe pse Komisioni parlamentar i Kuvendit të Kosovës e hartoi një propozim-ligj, që të votohet në Kuvend, por u refuzua nga Kryesia e Kuvendit dhe Qeveria e Kosovës. Po shihet qartë që as kjo Qeveri nuk po e ka vullnetin që ta ndryshojë gjendjen për të mirë, kjo për faktin se nëse fillon që gjërat t’i vendosë në
binarë, do të duhej t’i godasë direkt bizneset e pista që janë të lidhura me të ”fortët” e politikës, e të cilët e kanë sjellë Kosovën në këtë gjendje të mjerueshme, dhe interesat e shumë zyrtarëve të lartë. Korrupsioni nëpër institucione, kontrabanda nëpër Dogana, informaliteti, zhvatja e parasë publike, keqpërdorimet po vazhdojnë me ritëm të njëjtë, sikurse në qeverisjet e kaluara.
Kemi parë dhe i shohim çdo ditë, ku shumë ministra dhe zyrtarë të Qeverisë, keqpërdorin veturat zyrtare për nevoja private, por shumë prej tyre edhe në plazhet e bregdetit shqiptar. E shohim çdo ditë se keqpërdorime bëhen, me paratë e taksapaguesve të Kosovës. Prandaj, nuk ia vlen edhe nëse bëhet riformatimi i Qeverisë, për ta larguar ndonjë ministër për performancë të dobët, kur gjërat e mëdha që janë shtysë për zhvillim ekonomik dhe zbutje të papunësisë, ekzekutivi nuk i përfill dhe nuk i realizon.
Degradimi i shtetit
Kam shumë pak shpresë që kjo Qeveri do të jetë e suksesshme dhe do ta luftojë korrupsionin, krimin e organizuar, kontrabandën, informalitetin dhe do të ketë sukses në rimëkëmbjen e ekonomisë dhe zbutjen e papunë- sisë. Alternativa e vetme dhe që mund ta nxjerrë Kosovën nga kjo gjendje e mjerueshme, është që deri në përgatitjen e zgjedhjeve të reja, të kemi një Qeveri ekspertësh dhe të krijohet një formacion i ri politik, i përbërë nga intelektualë të rinj, profesionistë, me integritet të lartë dhe të panjollosur, me të cilët jo vetëm që do të kishim zhvillim të hovshëm ekonomik, por dhe integrim më të shpejtë drejt BE-së. Kjo është e
vetmja alternativë, alternativë tjetër nuk ka, sepse me këtë kastë të vjetër politike, të degraduar, të kriminalizuar, të korruptuar, të konsumuar… shteti do të shkojë akoma më shumë drejt humnerës.
Kasta e vjetër politike na e dëshmuan se çfarë janë në gjendje t’i bëjnë shtetit, ta shkatërrojnë dhe ta degradojnë deri në themel!
Partneriteti BE me Lindjen pa ambicie të mëdha
Samiti i BE-së me disa ish-republika sovjetike ka gjasa të zhgënjejë disa shtete pjesëmarrëse. Sepse Brukseli nuk është i gatshëm për hapa, për të cilat shpresohet sidomos në Kiev dhe Tbilis.
Ukraina dhe Gjeorgjia kanë shpresa të mëdha te samiti i Partneritetit Lindor, që zhvillohet në kryeqytetin letonez Riga më 21 dhe 22 maj. Në Partneritetin Lindor marrin pjesë edhe Azerbajxhani, Armenia, Bjellorusia dhe Moldavia. Programi i BE-së promovon marrëdhëniet politike, ekonomike dhe sociale me vendet partnere dhe mbështet njëkohësisht reformat e tyre politike dhe social-ekonomike. Brukseli do të afrojë në këtë mënyrë më shumë me BE-në gjashtë ish-republikat sovjetike, por pa i përfshirë ato në Bashkimin Evropian.
Shpresat më kot të Kievit
Padyshim që kriza në Ukrainë do të jetë tema dominante e samitit. Ambasadori i Ukrainës në BE Konstantin Jelisejev deklaroi më parë se takimi në Riga do të tregojë, “nëse janë nxjerrë mësimet e duhura nga e kaluara dhe nga ngjarjet e vitit të kaluar”. Meqenëse Brukseli do që ta bindë Kremlinin që Partneriteti Lindor nuk drejtohet kundër Rusisë, nga BE në Riga nuk priten deklarata të mprehta në drejtim të Moskës.
Përveç kësaj BE e ka bërë të qartë se situata në Krime dhe në Ukrainën lindore nuk ndryshon pozicionin e tij, përsa i përket “perspektivës evropiane” të Kievit. Ukraina kërkon një perspektivë të anëtarësimit në BE. Por në një të ardhme të afërt ai nuk mund të presë ndonjë afrim më të madh me BE-në që të shkojë përtej marrëveshjes së nënshkruar të asociimit dhe tregtisë së lirë. Ajo vetëm mund të shpresojë në Riga për një vlerësim pozitiv të përpjekjeve të saj për heqjen e detyrimit për viza. Qeveria e Ukrainës dëshiron që ukrainasit në të ardhmen të mund të udhëtojnë pa viza në BE. Kievi ka plotësuar dhjetë nga 15 kriteret e kërkuara nga BE, theksoi Jelisejew. Sipas tij detyrimi për të pasur viza mund të hiqet së shpejti. Por vëzhguesit nuk presin që kjo të ndodhë këtë vit.
Georgjia duhet të presë, Moldavia ka prioritet
Gjeorgjia është e mendimit se i ka plotësuar tashmë të gjitha kushtet e BE-së për heqjen e vizave. Tbilisi bazohet në një raport të Komisionit Evropian, në të cilin konstatohet ecuria e reformave. Prandaj qeveria gjeorgjiane i drejtohet me një letër kryetarëve të shteteve dhe qeverive të BE-së. Në të ajo ka kërkuar lehtësimin e rregullave për viza, me qëllim marrëdhëniet që të thellohen. Ajo shpreh edhe shpresën, se samiti në Riga do t’i japë vendit një “perspektivë evropiane”. Por nga dokumentet paraprake të samitit del se kjo nuk do të ndodhë së shpejti. Për këtë arsye vëzhguesit në Tbilis besojnë se Gjeorgjia është bërë “viktimë e solidaritetit të saj” dhe do të përfitojë heqjen e regjimit të vizave vetëm së bashku me Ukrainën.
Republika e Moldavisë, e cila si Gjeorgjia dhe Ukraina ka përmbyllur tashmë një marrëveshje asociimi me BE-në, ka mundur të arrijë lehtësime lidhur me vizat për në BE.
Nuk ka marrëveshje me Jerivanin dhe Bakunë
Pritjet e Armenisë nga samiti janë të vagullta. Sipas vëzhguesve armenë, qeveria armene në Riga do të bëjë në rradhë të parë të qartë se pavarësisht nga bashkëpunimi me Bashkimin Ekonomik të Euroazisë (EAWU) ajo nuk largohet nga Evropa dhe se ekzistojnë fusha të bashkëpunimit me BE-në, që përputhen me një anëtarësim në EAWU. EAWU është një treg i brendshëm me bashkim doganor, i dominuar nga Rusia, në të cilin bëjnë pjesë edhe Bjellorusia dhe Kazakistani. Një marrëveshje asociimi dhe e tregtisë së lirë mes BE-së dhe Armenisë nuk mund të firmoset pas deklarimit të Armesinë për t’u bashkuar me EAWU, meqënëse anëtarësia në bashkimin doganor nuk është në pajtueshmëri me marrëveshjen e BE-së.
Edhe Azerbajxhani nuk pret diçka të veçanë nga samiti. Me lehtësim qeveria në Baku priti lajmin se BE-ja dëshiron të ndryshojë konceptin në lidhje me gjashtë shtetet dhe se do ta formësojë në mënyrë individuale Partneritetin Lindor. Bakuja ka deklaruar që në vitin 2013, se nuk dëshiron të nënshkruajë një marrëveshje asociimi me BE. Ajo preferon marrëveshje individuale, si në bashkëpunimin në fushën e energjisë.
Pritjet e bjellorusëve
Të pakta mund të cilësohen edhe pritjet e bjellorusëve nga samiti. Një afrim me BE në çështjen e vizave nuk është parashikuar. Sipas vëzhguesve në Minsk Bjellorusia synon thellimin e bashkëpunimit ekonomik me BE, pa dashur të ndryshojë arkitekturën ekzistuese të marrëdhënieve me jashtë.BE-ja i ndërlidh negociatat me Minskun me fundin e represioneve dhe lirimin e të burgosurve politikë. BE-ja ka vënë nga njëra anë një regjim sanksionesh kundër atyre përfaqësuesve të regjimit, që janë përgjegjës për represionin dhe mbështet nga ana tjetër shoqërinë civile bjelloruse. Prapa skenave të samitit, vëzhguesit mendojnë, se mund të flitet për të paktën për një heqje të pjesshme të sanksioneve të BE-së.
