Nga qelitë në hotele me 5 yje, Bardhi: Kush i lejoi këto privilegje?
Kryetari i Grupit Parlamentar të Partisë Demokratike, Gazment Bardhi, ka reaguar ashpër pas deklaratave të Drejtorit të Policisë së Burgjeve në Komisionin e Sigurisë, lidhur me kushtet dhe sendet e gjetura në qelitë e të dënuarve të njohur si eksponentë të krimit të organizuar.
Bardhi i ka cilësuar deklaratat skandaloze dhe të papërgjegjshme, duke akuzuar drejtuesin e institucionit se po përpiqet të justifikojë kushtet luksoze të krijuara në qelitë e burgjeve shqiptare.
Sipas tij, në vend që të japë shpjegime se si u lejua që qelitë të shndërroheshin në ambiente luksi për persona të rrezikshëm të botës së krimit, Drejtori i Policisë së Burgjeve ka zgjedhur të relativizojë situatën me argumente se bëhej fjalë për sende të tepërta, por jo të ndaluara.
Kreu i grupit parlamentar të PD-së thekson se legjislacioni shqiptar dhe Rregullorja e Përgjithshme e Burgjeve përcaktojnë qartë sendet që lejohen në qeli dhe kushtet e administrimit të tyre. Ai kundërshton çdo interpretim që, sipas tij, mund të përdoret për të justifikuar luksin, instalimet e pajustifikuara apo investimet private brenda institucioneve penitenciare.
Në reagimin e tij, Bardhi kërkon përgjegjësi institucionale dhe masa ndaj Drejtorit të Policisë së Burgjeve, duke argumentuar se një ministër i Drejtësisë që mban përgjegjësi duhet të kërkojë menjëherë llogari, deri në shkarkimin e tij.
Në përfundim, Bardhi thekson se institucionet penitenciare duhet të garantojnë zbatimin e ligjit, disiplinën dhe sigurinë, dhe jo të krijojnë privilegje për personat e lidhur me krimin e organizuar.
“Burgjet nuk janë hotele luksi. Qelitë nuk janë prona private. Dhe krimi i organizuar nuk mund të ketë privilegje që qytetarët e zakonshëm as nuk mund t’i imagjinojnë”, shkruan Bardhi.
REAGIM I KRYETARIT TË GRUPIT PARLAMENTAR TË PD, GAZMENT BARDHI
Kjo është një deklaratë skandaloze, e papërgjegjshme dhe thellësisht antishtetërore!
Në vend që të japë llogari se kush e lejoi dhe si u bë e mundur që qelitë e burgjeve shqiptare të shndërroheshin në hotele luksi me pesë yje, për eksponentë të rrezikshëm të krimit të organizuar, Drejtori i Policisë së Burgjeve zgjedh të justifikojë këtë situatë me argumente absurde, si: “edhe bota lejon personalizimin” apo se “ishin sende të tepërta, por jo të ndaluara”.
Ky arsyetim nuk është thjesht i papranueshëm. Ai përbën një përpjekje të hapur për të relativizuar shkeljen e ligjit dhe për të shmangur përgjegjësinë institucionale.
Legjislacioni shqiptar dhe Rregullorja e Përgjithshme e Burgjeve përcaktojnë qartë dhe në mënyrë shteruese sendet që lejohen të mbahen në qelitë e burgjeve, si dhe kushtet në të cilat ato duhet të administrohen. Asnjë dispozitë ligjore nuk mund të interpretohet si leje për luks të pakufizuar, për instalime të pajustifikuara apo për investime private që cenojnë regjimin dhe sigurinë e institucioneve penitenciare.
Të justifikosh luksin e pajustifikueshëm të eksponentëve të krimit të organizuar brenda burgjeve shqiptare do të thotë të pranosh si të normalizuar shkeljen e ligjit dhe të tradhtosh vetë misionin e institucioneve që duhet ta zbatojnë atë.
Në një shtet që funksionon mbi përgjegjshmërinë dhe sundimin e ligjit, pas një deklarate të tillë, Drejtori i Policisë së Burgjeve nuk do të duhej të rikthehej në zyrë sikur të mos kishte ndodhur asgjë. Një ministër i përgjegjshëm i Drejtësisë do të kërkonte menjëherë llogari dhe do të merrte masa konkrete, deri në shkarkimin e tij.
Burgjet nuk janë hotele luksi. Qelitë nuk janë prona private. Dhe krimi i organizuar nuk mund të ketë privilegje që qytetarët e zakonshëm as nuk mund t’i imagjinojnë. Detyra e strukturave të sigurisë në burgje është të garantojnë zbatimin e ligjit, disiplinën dhe sigurinë, jo të sigurojnë rehatinë e krimit të organizuar!
