Gjyqi ndaj Metës, Cakrani: KLGJ dhe institucionet po heshtin përballë shkeljeve të rënda, procesi të transmetohet live

Gjyqi ndaj Metës, Cakrani: KLGJ dhe institucionet po heshtin përballë shkeljeve të rënda, procesi të transmetohet live

Avokati i ish-presidentit Ilir Meta, Kujtim Cakrani, ka kërkuar që procesi gjyqësor në çështjen CEZ-DIA të zhvillohet me transparencë të plotë dhe të transmetohet online, duke e cilësuar këtë një standard të domosdoshëm të drejtësisë moderne.

Në një deklaratë për mediat, Cakrani tha se gjyqe të rëndësishme historike dhe ndërkombëtare janë zhvilluar publikisht dhe se e njëjta praktikë duhet të zbatohet edhe në Shqipëri.

Gjyqet bëhen me kamera dhe online që t’i shikojnë qytetarët. Edhe në Hagë, për krime kundër njerëzimit, proceset janë publike. Pse të mos jetë i tillë edhe gjyqi i një presidenti?”, u shpreh ai.

Sipas tij, vendimi për të mos lejuar transmetimin e seancave është antikushtetues dhe krijon dyshime për mungesë transparence në proces.

Cakrani kritikoi gjithashtu institucionet e drejtësisë, duke thënë se ato duhet të garantojnë standarde të njëjta me ato evropiane dhe të mos lejojnë, siç u shpreh ai, “shkelje të të drejtave të njeriut në proces gjyqësor”.

Ai theksoi se çështja nuk ka të bëjë vetëm me Ilir Metën, por me parimet e shtetit të së drejtës dhe dinjitetin njerëzor, duke shtuar se çdo proces gjyqësor duhet të jetë i hapur për publikun dhe median.

Cakrani:

Edhe po të shikoni të gjithë gjyqet, që nga 1945-a, gjyqi i Teme Sejkos, Kadri Hazbiut, Fiqret Shehut, kë doni ju të marr më unë? Ramiz Alisë, Fatos Nanos, gjyqin në Hagë. Gjyqet, të gjitha gjyqet bëhen me kamera dhe bëhen online që t’i shikojnë qytetarët. Dhe kur bëhet gjyqi në Hagë, një gjyq për, ju e dini, krime kundër njerëzimit apo racizëm, imagjinoni tani që mos të bëhet gjyqi i presidentit. Dhe unë prandaj kërkoj që kjo gjykatë të ngrihet në lartësinë që e kërkon Kushtetuta dhe ligji dhe konventa dhe të vendosi presidentin në kushte të barabarta dhe padyshim që ta vendosi përballë shqiptarëve që të provojë pafajësinë e tij. Fakti që kjo gjykatë, nuk merr vendim ta japi, ta shfaqi gjyqin online, vërteton dhe njëherë që kjo ka frikë nga provat.

Kjo ka frikë nga e vërteta dhe prandaj ata nuk kanë guximin që ta transmetojnë që të shikojnë shqiptarët montimin që i ka bërë prokuroria çështjes së zotit Meta. Dhe kjo është ajo për të cilën ne kemi bërë kërkesën. Ju e dëgjuat vetë gjykatën, e dëgjuat vetë, ç’arsyetim i bëri, ndërkohë që ju referua një terroristi në Francë dhe nuk ju referua rastit të Sarkozisë. Atëherë çfarë t’i bëjmë ne gjykatës? Ne mjetet këto kemi. Ne mjete ligjore, kërkesat bazuar në Kushtetutë dhe në konventë. Ne këto kemi. Se çmendet gjykata, ne nuk kemi çfarë t’i bëjmë.

Në këtë vend, në vitin ’93, ’94, ’95, ’93, ’94, ’95, gjyqi i Fatos Nanos është bërë në kushte të barabarta. Gjyqi i të gjithë atyre Ramiz Alisë, Nexhmije Hoxhës dhe të gjithë atyre që u shfaqën, që u u dënuan atëherë për krime kundër njerëzimit, janë bërë të hapur për gazetarët, për mediat dhe RTSH-ja i keni aty, do futeni dhe do i shikoni që janë gjyqe të bëra publik. Nuk e kuptoj dot gjykatën, merr një vendim antikushtetues, se antikushtetues është, dhe thotë që ne nuk do ta shfaqim publikisht këtë, këtë proces gjyqësor. Kur i pandehuri vetë shfaq dëshirën, shfaq të gjithë çfarë ai dëshiron dhe ti mos t’ia plotësosh, nuk e di vetëm gjykata mundet. Ju duhet t’ia bëni këtë pyetje gjykatës, do t’ia bëni KLGJ-së, do t’ia bëni Ministrit të Drejtësisë dhe do t’ia bëni të gjithë ndërkombëtarëve të cilët ne na tregojnë se sa e mirë është kjo drejtësia shqiptare. Dhe ata ndërkombëtarët, unë do t’i ftoj, do bëj një letër, që të vijnë në seancën tjetër të shikojnë presidentin e Republikës mbyllur në kafaz. Kjo është e papranueshme. Ne avokatët, kur flasim, ne paragjykohemi sepse mendohet që ne kemi konflikt interesi.

Përtej miqësinë që kam me ju, ju falenderoj për punën tuaj, ju që kaq i keni por, problemi qëndron që është e papranueshme sot në vitin 2026 që ti të mbash mbyllur në kafaz presidentin e Republikës, kryetarin e bashkisë dhe çdo funksionar tjetër. Sepse aty e humbet nuancën e të qenit një shtet i së drejtës dhe bëhesh ti, bëhesh diskriminues. Ju e mbani mend, unë prandaj ju referova dhe gjykatës, sepse vetëm këto sjellje i bënte vetëm ISIS-i 10 vite më parë në Siri, e mbani mend besoj, kur i arrestonte dhe i shëtiste në kafaz nëpër qytet. Unë nuk di rast tjetër. Në Kosovë e patë, javën e shkuar, përfundoi një proces gjyqësor me burgim të përjetshëm dhe ai individi u gjykua, në të gjithë procesin gjyqësor në krah të avokatit të tij.

Më gjeni një precedent tjetër në Evropë dhe ia bëni pyetje gjykatës. Ia bëni pyetje atyre palaçove të Këshillit të Lartë Gjyqësor, atyre se ata më palaçot janë Këshilli i Lartë Gjyqësor, që shikon një shkelje kaq të rëndë të Kushtetutës dhe të konventave evropiane dhe rrinë atje në zyra me kondicioner dhe nuk flasin një fjalë të vetme që shkelet liri dhe të drejtat e njeriut. Si mundet një president Republike të rrijë mbyllur në kafazin e qelqtë? Më thoni një rast të dytë dhe unë tërhiqem nga të gjitha kërkesat e mia.

Prandaj jam i acaruar sot. Ndoshta unë jam një çikë më i ndjeshëm për liritë dhe të drejtat e njeriut, qoftë dhe për vokacionin tim familjar, po është e papranueshme. Kur këtu në të gjithë ecurinë e 100 viteve shtet janë bërë të gjitha edhe në kohën e mbretërisë. Kur u gjykuan në ’35-ën, dhe në ’35-ën, kur mbreti Zog gjykoi ata të revolucionit të Fierit, i ka bërë gjyqe të hapura publike. S’kishte media atëherë, por janë bërë publike.

Vetëm në vetëm në Shqipërinë e 2026-ës, të reformës së re në drejtësi, që ia thashë dhe gjykatës, për turpin e tyre, për turpin e këtyre deputetëve dhe kësaj shoqërie që pranon një diskriminim të tillë. Sepse sot është presidenti, nesër do jetë Edi Rama, pasnesër do jetë dikush tjetër aty. Dhe kështu që unë mendoj dhe besoj që ju do ta vazhdoni këtë betejë. Kjo është betejë për dinjitetin njerëzor. Nuk është betejë as për Kujtim Cakranin, as për zotin Meta. Është betejë për dinjitetin njerëzor.