Christian Forneck në selinë blu/ Këlliçi: Integrimi në BE dhe lufta kundër korrupsionit në fokus të takimit

Këshilltari për Marrëdhëniet me Jashtë dhe Sigurinë i grupit CDU/ CSU në Bundestagun gjerman, Christian Forneck, zhvilloi një takim në selinë e PD me kryetarin Sali Berisha, deputetët Tomorr Alizoti dhe Belind Këlliçi, si dhe Sekretarin për Marrëdhëniet me Jashtë, Enri Çeno.

Këtë takim e ka publikuar në Facebook, deputeti Belind Këlliçi, i cili thekson se marrëdhëniet në rritje mes dy forcave politike, riafirmojnë bashkëpunimin e ngushtë mes tyre në funksion të zhvillimeve demokratike në Shqipëri.

Gjithashtu Këlliçi shprehet se me Forneck ndanë qëndrime të përbashkëta mbi procesin e integrimit europian të Shqipërisë, duke u ndalur veçanërisht te sfidat që lidhen me shtetin ligjor dhe luftën kundër korrupsionit.

Në takim u përmend gjithashtu mbështetja e vazhdueshme e CDU/CSU dhe Fondacionit Konrad Adenauer, si dhe roli i drejtuesit të tij në Shqipëri, Dr. Thomas Kunze, në forcimin e institucioneve demokratike në vend.

Postimi i plotë:

Një takim i shkëlqyer sot në selinë e PD me Christian Forneck, Këshilltarin për Marrëdhëniet me Jashtë dhe Sigurinë të grupit CDU/CSU në Bundestag, ku u konfirmuan raportet në rritje mes formacioneve tona poilitike.

Me zyrtarin e lartë gjerman, ndamë vullnetin e palëkundur për anëtarësimin e Shqipërisë në BE, dhe sfidat që ka ky proces që kanë të bëjnë me shtetin ligjor dhe korrupsionin.

Roli i Partisë Demokratike për transparencë dhe luftë pa kompromis me abuzimin me pushtetin vlerësohet nga partnerët.

Ne jemi falenderues për ndihmën e vazhdueshme që CDU/CSU ka dhënë për Shqipërinë dhe për Partinë Demokratike në dekada tashmë, e në mënyrë të veçantë gjithashtu Fondacioni Konrad Adenauer dhe drejtuesi i saj në Shqipëri Dr. Thomas Kunze.

Integrimi europian bazohet në meritë dhe kërkesat dhe kriteret s’mund të anashkalohen, ato duhen plotësuar me punë, përkushtim dhe me vullnet të qartë politik.