Anxhela Tato
Shpërthim/ Atentat me eksploziv makinës së arkitektes në autostradë
Dyshimet, lënda plasëse u aktivizua nga celulari, u montua në Kavajë kur 39-vjeçarja kishte ndaluar
Policia, Entela Çano mohon të ketë probleme apo konflikte, pronare e një studioje projektimi
Eksploziv automjetit të arkitektes teksa ishte duke u kthyer nga Kavaja për në Tiranë. Entela Çano ishte duke udhëtuar në autostradën Tiranë-Durrës kur ka parë flakë që të dilnin nga pjesa e përparme e makinës. E tmerruar 39-vjeçarja ka dalë me shpejtësi nga automjeti tip “Mitsubishi”, i cili brenda pak minutave është përfshirë nga flakët. Nga të dhënat e policisë mësohet se lënda plasëse ka qenë e montuar në pjesën e pasme të automjetit dhe shpërthimi ka qenë i telekomanduar. Dyshimet e bluve janë që eksplozivi C4 është montuar në momentin që makina ndodhej e parkuar në Kavajë, ku arkitektja 39-vjeçare kishte ndaluar për të takuar një mik. Vetë e pyetur nga oficerët e policisë gjyqësore Entela Çano ka mohuar që të ketë konflikte ose probleme. Ajo është shprehur e gëzuar që ka arritur të mbijetojë, ndërsa ka kërkuar nga policia që të mbyllet sa më parë kjo çështje. Nga ana e bluve kanë nisur hetimet për akuzën e vrasjes me dashje mbetur në tentativë dhe përdorimit të armëve luftarake. Ndër pistat që do të hetohen për këtë ngjarje janë konfliktet që mund të jetë e përfshirë e reja, por në vendin e ngjarjes nuk janë gjetur gjurmë gishtat që mund të çojnë në identifikimin e autorëve. Entela Çato është nëna e dy fëmijëve dhe së bashku me bashkëshortin e saj kanë një studio projektimi në kryeqytet.
Hetimet
Dy orë pas ngjarjes, Policia e Durrësit konfirmoi zyrtarisht se u gjeten gjurmë të lëndës plasëse në pjesën e përparme të mjetit. Nga dëshmitë e gruas, e cila është nënë e dy fëmijëve dhe bashkë me burrin e saj kanë një studio projektimi në Tiranë, është mësuar se në fakt nuk ka asnjë problem ndaj nuk ka asnjë të dyshuar për aktin. Grupi i ekspertëve, kanë nisur verifikimin e të gjithë rrugëtimit të mjetit, vendet ku është lënë i parkuar jo vetëm gjatë paradites së djeshme por edhe ditëve të fundit, ndërsa burimet e policisë bëjnë me dije se identifikimi i autorëve të sulmit me bombë ndaj gruas është mjaft i vështirë për shkak se nuk është lënë asnjë gjurmë në mjet për shkak të djegies. Ekspertët bëjnë me dije se mjeti lënda plasëse është aktivizuar me anë të një celulari ndërsa dyshohet se mina të jetë montuar shumë orë para se të shpërthehej. Policia ka marrë në pyetje edhe bashkëshortin e të shënjestruarës ndërsa po verifikojnë ndonjë konflikt që mund të kenë çifti për të shkuar tek autorët e ngjarjes. Referuar të dhënave të policisë së Durrësit, të cilat kanë vijuar të transmetohen nga zyra e shtypit e kësaj drejtorie në lidhje me këtë ngjarje përgjatë gjithë ditës së djeshme, mësohet se Entela Çano ka qenë duke u kthyer nga Kavaja. Atje gruaja ka qenë në një takim dhe mësohet se ka rrugëtuar e vetme. Sipas të dhënave mjeti i saj u hodh në erë me eksploziv tek mbikalimi i Sukthit. Në vendngjarje përveç grupit hetimor të Policisë së Durrësit u panë drejtues të lartë të Policisë së Shtetit, Sokol Bizhga e Arben Dashi. Si pasojë e situatës së krijuar, qarkullimi në autostradë Durrës-Tiranë u bllokua në një distancë prej rreth 1 km, duke shkaktuar trafik të rënduar. Rastet e sulmeve me eksploziv vijon të jetw ndër krimet më të vështira për tu zbuluar nga ana e forcave të policisë. Përdorimi i lëndëve plasëse shkatërron gjurmët që mund të kenë lënë autorët, të cilët në pjesën më të madhe të rasteve janë të paguar. Një ngërç tjetër është mos identifikimi i pronarit të kartës SIM që gjendet në mbetjet e eksplozivit, por në pjesën më të madhe të rasteve rezulton e regjistruar në emrin e ndonjë të vdekuri ose të ndonjë personi që nuk e ka më numrin në përdorim.
Durrës/ Shkatërrohet baza e falsifikimit të dokumenteve, sekuestrohen vula italiane
Shkatërrohet një bazë moderne e falsifikimit të dokumenteve shqiptare dhe italiane në Shijak. Në objektet e sekuestruara ishin edhe disa vula italiane. Operacioni i Koduar “klienti” nga sektori kundër Krimit Ekonomik dhe Financiar në Policinë e Durrësit. Policia ka arrestuar Muhamet Strefin dhe Alvaro Strefin pas kontrollit në banesë. Në këtë bazë falsifikimi u gjetën dhe u sekuestruan 8 vula të ndryshme si: Vulë noteriale italiane me qendër në Milano; Vulë komune Milano/Itali; Vulë komune Monza/Itali; Vulë avokatie Italiane; Vulë e Drejtorisë Rajonale e Shfrytëzimit të Automjeteve në Durrës; Vulë e Kontrollit Teknik Durrës; Vulë noterie shqiptare; Vulë për lëshimin e mandat-pagesave te Drejtorisë Rajonale të Transportit Rrugor Durrës. Gjithashtu është sekuestruar një sasi e konsiderueshme dokumentesh të falsifikuara, si: policë sigurimi, certifikata pronësie italiane si dhe prokura te posaçme, leje drejtimi automjetesh shqiptare, leje drejtimi italiane, karta identiteti italiane, leje qëndrimi greke, dokumente të kontrollit teknik të automjeteve, leje qarkullimi ndërkombëtare, dokumente të kontrollit teknik te automjeteve të shtetit anglez si dhe dokumente të tjera të Drejtorisë Rajonale të Shfrytëzimit të Transportit Rrugor Durrës. Hetimet për këtë bazë të falsifikimit të dokumenteve kanë nisur prej 4 muajsh, në bashkëpunim me Prokurorinë Pranë Gjykatës së Shkallës së Parë në Durrës.
Tiranë/ Shitësi ambulant plagos 25-vjeçarin, i kërkoi të ulet zërin
Plagos 25-vjeçarin pasi i kërkoi të mos bërtiste. Ngjarja ka ndodhur mbrëmjen e djeshme rreth orës 21:10 në afërsi të zonës së “Pallatit me shigjeta” . Nga burime të policisë bëhet me dije se 25-vjeçari është konfliktuar me një shitës ambulant bananesh. Fillimisht të dyja palët kanë debatuar dhe janë konfrontuar fizikisht. Por situata ka degraduar kur 60-vjeçari ka nxjerrë thikën dhe ka goditur 25-vjeçarin dhe është larguar me vrap. Me shpejtësi ka mbërritur në vendin e ngjarjes mbërriti policia, e cila ka mundur të arrestojë 60-vjeçarin. Ndërsa është shoqëruar për mjekim në spital 25-vjeçari, i cili ndodhte jashtë rrezikut për jetën. I plagosuri ishte nën shoqërinë e një shoku, i cili ka rrëfyer për blutë mekanizmin e ngjarjes. Sipas dëshmsië së të riut shitësi ambulant ulërinte në rrugë: Hajde banane, banane. Në këto momente ka ndërhyrë 25-vjeçari duke i kërkuar që të ulte zërin. Mes tyre janë shkëmbyer ofendime dhe i moshuari është sulur për t’i dhunuar djemtë. Por situata është acaruar dhe ka mbetur i plagosur 25-vjeçari.
