Sonja Caka
Policia prangos 23-vjeçarin Ardian Thaçi, nis hetimi edhe për inspektorin e zonës. Krimi në familje, pas një sherri banal mes babë e bir
Tri ditë pas vdekjes “aksidentale” të babait, policia zbardh misterin. Fatos Thaçi nuk vdiq si pasojë e përplasjes së biçikletës së tij nga një makinë por nga dora e djalit të tij. Policisë së Tiranës i është dashur 3 ditë hetime intensive dhe mbledhje provash për të zgjidhur këtë ngjarje, të cilën për kaq ditë e arkivoi si vdekje aksidentale. Nga hetimet paraprake dhe dëshmitë e para të djalit të dyshuar për vrasjen e të atit, gjithçka ndodhi pas një sherri banal mes babë e bir. Pas kësaj, 23-vjeçari Ardian Thaçi ka qëlluar disa herë me mjete të forta të atin duke i shkaktuar vdekjen e menjëhershme. Më pas, vdekjen e babait do e raportonte si përplasje me makinë, për të larguar dyshimet se kishim të bënim me një krim brenda familjes. Policia e kryeqytetit vijoi hetimet dhe tri ditë pas ngjarjes, arrestoi djalin për vrasjen e të atit, shtetasit Fatos Thaçi. Ndërkohë, burime policore bëjnë me dije se po hetohet edhe inspektori i zonës për fshehje të ngjarjes.
Ngjarja
Policia e Tiranës ka zbardhur dje një vrasje e ndodhur ditën e mërkurë (12 shkurt 2014), e cila ishte regjistruar si aksident nga ana e policisë. Policia e Tiranës vetëm gjatë ditës së djeshme ka zbuluar të vërtetën rreth vdekjes së një banori të lagjes “Xhamllik” në kryeqytet, konkretisht të shtetasit Fatos Thaçi, kur prangosi një 23-vjeçar që kishte vrarë të atin. Fillimisht, të mërkurën, ngjarja ishte raportuar si aksidentale, sikur Fatos Thaçi ishte përplasur me biçikletë dhe për pasojë kishte gjetur vdekjen. Ngjarja u arkivua si e tillë nga oficerët e policisë të komisariatit nr. 4 në Tiranë, të cilët në raportet e tyre referuan për plagë të marra pas një aksidenti.
Hetimi
Pas grumbullimit të provave të tjera, si dhe pas verifikimit të saktësive të dëshmive të djalit të viktimës, ekspertët nisën të dyshonin se diçka nuk shkonte dhe se djali nuk po thoshte të vërtetën rreth ngjarjes. Ai ishte përherë edhe më kontradiktor në deklarimet e tij. Sipas burimeve, 23-vjeçari Ardian Thaçi nuk ishte i qartë rreth pyetjeve se ku kishte qenë momentin e aksidentit, gjë e cila solli edhe rinisjen e hetimeve. Grupit hetimor i rezultoi se ngjarja kishte ndodhur pas një sherri me djalit dhe të atit, ndërsa 23-vjeçari e kishte goditur në kokë me sende të forta. Si pasojë e këtij veprimi, Fatos Thaçi ka pësuar fraktura të shumta në kokë dhe ka gjetur vdekjen e menjëhershme. Policia vendosi të ndjekë penalisht edhe oficerin që kishte kryer veprimet hetimore, derisa të sqarohen më pas të gjitha rrethanat e kësaj ngjarjeje. Ndërkaq, 23-vjeçari i arrestuar pritet të marrë masën e sigurisë në Gjykatën e Krimeve të Rënda për krimin e kryer brenda familjes.
Pogradec
Plagosi me thikë në qafë kushërirën, “arrest me burg” për Sandokanin
Gjykata e Pogradecit ka caktuar masën e sigurisë “arrest me burg” për 29-vjeçarin Sandokan Meçaj, i cili plagosi me thikë në qafë kushërirën e tij me të cilën kishte lidhje intime. Ngjarja e pazakontë u shënua tri ditë më parë në fshatin Memlisht të Pogradecit. Sipas akuzës, 34-vjeçarja Bona M., lindur në Shkodër dhe nënë e tre fëmijëve është qëlluar me thikë nga djali i tezes së saj. Ajo ishte zhvendosur prej 7 muajsh në Pogradec dhe jetonte në familjen e tezes së saj. E martuar në Malësi të Madhe, 34-vjeçarja është detyruar të largohet, pasi burri i saj vrau një person në vitin 2011. Pas zhvendosjes së saj në shtëpinë e tezes, ajo nisi një marrëdhënie intime me kushëririn e saj 27-vjeçar, Sandokan Meçaj. Sipas burimeve zyrtare nga Policia, 34-vjeçarja dhe kushëriri i saj (i divorcuar), prej muajsh kishin krijuar një lidhje intime. Meçaj e ka qëlluar me thikë “të dashurën” e tij me të cilën ka lidhje gjaku, për shkak të xhelozisë, pas një debati të çastit në rrugë. Kanë qenë banorët e zonës, të cilët e kanë transportuar me urgjencë 34-vjeçaren në spital. Më pas, 29-vjeçari është vetëdorëzuar në polici së bashku me thikën. Ai akuzohet për veprën penale “tentativë vrasjeje”.
Burrel
Kushtet e vështira të trajtimit në burg, 17 të dënuar në grevë urie
Një grup të dënuarish në burgun e sigurisë së lartë në Burrel prej 5 ditësh ndodhen në grevë urie. Bëhet fjalë për 17 të dënuar të cilët deklarojnë se janë futur në grevë për shkak të kushteve çnjerëzore të trajtimit brenda ambjenteve të këtij burgu. Sipas të dënuarave, ata janë transferuar në këtë burg pas mbylljes së burgut të Lezhës. Ata akuzojnë për trajtim çnjerëzor dhe të diferencuar nga gardianët e këtij burgu, çka detyroi një grup të komisionerëve të Avokatit të Popullit të nisen dje drejt Burrelit. Të dënuarit kanë akuzuar gardianët se nuk i kanë lejuar të realizojnë edhe një takim me drejtorin e burgut.
Korçë
Gjendet i pajetë një person, policia heton vdekjen
Trupi pajetë i një personi, ende i paidentifikuar, është gjetur mëngjesin e djeshëm në Korçë. Sipas burimeve policore, viktima është e seksit mashkull, rreth 50 vjeç është gjetur dje nga punonjësit e ndërmarrjes së pastrimit, të cilët kanë lajmëruar menjëherë policinë. Në vendngjarje kanë shkuar forcat e policisë të cilat pasi kanë kqyrur viktimën e kanë të dërguar në morg ku do t`i bëhet edhe ekspertiza për të vërtetuar edhe shkaqet e vdekjes. Ndërkohë policia ka nisur hetimet për identifikimin e viktimës dhe zbardhjen e plotë të ngjarjes.
