Bota
Sociale
Sport
Kulturë
Koment
Kosovë

Propaganda e qeverisë do t’iu kushtojë taksapaguesve 149 mln lekë në vitin 2025

Buxheti i Agjencisë për Media e Informim që funksionon si “ministri e propagandës” për kryeministrin dhe qeverinë do t’i kushtojë taksapaguesve 149 milionë lekë, sipas parashikimeve në projektbuxhetin e vitit 2025.

Po, kjo shifër u cilësua si e ulët nga drejtori i kësaj agjencie Alteo Hysi gjatë një seancë dëgjimore të martën në Komisionin Parlamentar për Edukimin dhe Mjetet e Informimit Publik, ku po diskutohet në parim buxheti i ri.

“Është më i ulët se tavani buxhetor”, tha Hysi në komision duke shtuar se ishin ulur me 18 milionë lekë shpenzimet operative.

Fondi prej 149 milionë lekë do të përdoret kryesisht për paga dhe sigurime për 69 punonjës që ka në organikë kjo agjenci dhe që punon kryesisht për agjendën e kryeministrit duke prodhuar materiale të gatshme nga takimet apo aktivitetet e tjera të tij.

Në vitin 2024 buxheti i MIA-s ishte 156.9 milionë lekë, ndërsa në vitin 2023 ishte 122 milionë lekë.

Deputetë të opozitës kërkuan informacion për buxhetin që shpenzohej për pasqyrimin e aktiviteteve të tjera të kryeministrit Rama jashtë funksionit të tij si kryeministër dhe akuzuan Hysin se agjencia që ai drejtonte përdorej vetëm për propagandën qeveritare dhe jo për informim të publikut.

“Sa shpenzohet për podcastet e kryeministrit Rama dhe në cilin buxhet pasqyrohen”- e pyeti deputetja e Partisë Demokratike, Eralda Bano.

Hysi pretendoi se Podcasti i Ramës ishte një aktivitet jashtë funksionit të tij publik dhe si i tillë nuk mbulohej nga buxheti i agjencisë edhe pse kjo agjenci njofton çdo të dielë mediat për të ftuarit e Podcast të Ramës dhe dërgon videot e gatshme të tij për publikim.

I pyetur nga BIRN për këtë kontradiktë Hysi nuk dha një përgjigje të qartë se pse MIA angazhohej të përcillte këtë aktivitet të Ramës, që nuk është një aktivitet publik.

“Kanali i Whatsapit që ju i referoheni përdoret thjesht për lehtësi komunikimi me gazetarët”- tha ai, ndërsa këmbënguli se “burimet financiare, burimet njerëzore, apo logjistika që financohet me paratë e buxhetit të shtetit në funksion të aktivitetit të MIA-s, nuk përdoren në funksion të prodhimit të podcastit”.

Hysi u përfshi në debat me deputeten tjetër të PD-së, Oriela Nebijaj, e cila ngriti shqetësimin për rolin e kësaj agjencie. “Nuk është e nevojshme sepse është në shërbim kryekëput të kryeministrit”- tha ajo.

Por Hysi u përgjigj se me logjikën e deputetes as Shtëpia e Bardhë nuk do të kishte zyrë shtypi.

Ngritja e kësaj agjencie në fund të vitit 2021 dhe emërimi në krye të saj i Endri Fugës, këshilltarit më të afërt të Ramës, u prit me kritika nga organizatat e lirisë së shprehjes që e krahasuan institucionin e ri me një “ministri propagande”.

Në VKM për krijimin e saj parashikohet që agjencia kontrollon emërimin dhe shkarkimin nga puna të zëdhënësve të institucioneve qendrore dhe se kontrollon gjithashtu aktivitetin publik të ministrave, përfshirë konferencat e tyre për shtyp.

Organizatat ndërkombëtare për lirinë e shprehjes në një deklaratë të publikuar në tetor 2021 e quajtën “shqetësuese” krijimin e agjencisë dhe si një hap drejt përkeqësimit të lirisë së medias në Shqipëri.

Liria e medias është ndërkohë që shqetësim i ripërsëritur në progres-raportet e Komisionit Europian për Shqipërinë./BIRN

Share it :

Lajmet e fundit
Mato: Pastrimi i parave në ndërtim po lë të rinjtë pa strehë: Të monitoren transaksionet Në një kohë kur Tirana dhe zonat turistike të Shqipërisë përjetojnë një bum të jashtëzakonshëm ndërtimi, me kulla që ngrihen çdo ditë, një pyetje thelbësore po shqetëson gjithnjë e më shumë publikun: nga vijnë të gjitha këto para? Alarimin e ngriti Fanswa Mato, anëtar i departamentit “Brain Gain” në PD, i cili nga tryeza e diskutimit ‘Qeveria e Pasigurisë – dhe alternativa e opozitës’, denoncoi se pas fasadës së projekteve luksoze fshihet fenomeni i pastrimit të parave, duke e deformuar tregun dhe duke e bërë të pamundur për qytetarët e zakonshëm blerjen e një shtëpie. Mato, një profesionist me përvojë në menaxhimin e ndërtimit në Neë York, thekson paradoksin e hidhur të realitetit shqiptar: ndërsa miliona metra katrorë ndërtohen çdo vit, çmimet e apartamenteve kanë arritur nivele të papërballueshme për familjet mesatare. Fanswa Mato: Përvoja ime personale më ka dhënë mundësi të punoj në një mjedis ku standardet, transparenca dhe rezultatet konkrete janë thelbësore. Pikërisht kjo eksperiencë më motivon të kontribuoj me njohurinë dhe përvojën time për çështjet që lidhen me zhvillimin, mirëqenien dhe të ardhmen e Shqipërisë. Sot dua të flas për një nga problemet më serioze që po dëmton ekonominë shqiptare dhe po rëndon jetën e qytetarëve tanë: pastrimin e parave në sektorin e pasurive të paluajtshme dhe në ndërtim. Gjatë viteve të fundit kemi parë një bum të jashtëzakonshëm ndërtimesh, sidomos në Tiranë dhe në zonat turistike, ku kulla të reja ngrihen çdo ditë, projekte luksoze shtohen me ritme të shpejta dhe miliona metra katrorë ndërtohen çdo vit. Por pyetja që ushtrojnë shqiptarët është shumë e thjeshtë: nga vijnë të gjitha këto para? Sepse realiteti është ky: ndërsa ndërtohet gjithnjë e më shumë apartamente, qytetarët shqiptarë e kanë gjithnjë e më të vështirë të blejnë një shtëpi. Çmimet janë rritur në nivele të papërballueshme për familjet e zakonshme. Të rinjtë nuk arrijnë të sigurojnë një strehim, ndërsa shumë apartamente mbeten bosh dhe përdoren vetëm si instrumente financiare. Ky është paradoksi i Shqipërisë sot. Në njërën anë kemi një mbingopje me ndërtime, nga ana tjetër kemi mungesë strehimi për qytetarët. Kjo nuk është ekonomi normale tregu. Kjo është pasojë e deformimit të tregut nga paratë informale dhe nga mungesa e kontrollit shtetëror. Sipas të dhënave dhe analizave të institucioneve kombëtare dhe ndërkombëtare, Shqipëria ka pasur për vite me radhë probleme serioze në luftën kundër pastrimit të parave dhe organizata të rëndësishme ndërkombëtare kanë evidentuar dobësi në kontrollin financiar dhe në monitorimin e sektorit të ndërtimit. Gjatë analizës së këtij fenomeni, janë përdorur të dhëna nga institucione si Banka e Shqipërisë, INSTAT, Agjencia e Inteligjencës Financiare dhe FATF. Janë zhvilluar gjithashtu biseda me profesionistë të tregut, agjentë imobiliar, noterë dhe ekspertë financiarë. Të gjitha këto tregojnë se ekziston një shqetësim real për mënyrën se si fondet e dyshimta depërtojnë në ekonominë shqiptare. Mekanizmat janë të ndryshme. Në shumë raste përdoren kompani me burime financiare të paqarta, përdoren pagesa të mëdha kesh, transferta të dyshimta dhe forma të tjera që e bëjnë të vështirë gjurmimin e origjinës së parave. Në disa raste kemi dhe kompani që nuk justifikojnë nivelin e investimeve që realizojnë. Dhe kush e paguan koston e kësaj situate? E paguajnë qytetarët shqiptarë, e paguajnë familjet e reja, e paguajnë bizneset e ndershme, e paguan ekonomia e vendit. Sepse kur paratë e paligjshme futen në treg, konkurrenca bëhet e padrejtë. Çmimet rriten artificialisht, korrupsioni forcohet, besimi tek shteti dobësohet dhe në fund humb qytetari i zakonshëm që punon me ndershmëri. Si opozitë, ne kemi detyrimin moral dhe politik të ngremë zërin për këtë problem. Shqipëria nuk mund të ndërtojë të ardhmen mbi ekonomi informale dhe mbi mungesë transparence. Ne kemi nevojë për institucione të forta, për kontroll real financiar dhe për shtet ligjor funksional. Ne kërkojmë rritje të transparencës në transaksionet e pasurive të paluajtshme, kufizim të pagesave kesh në sektorin e ndërtimit, kontroll më të fortë mbi burimin e fondeve, monitorim më rigoroz të kompanive të ndërtimit, bashkëpunim më të madh mes institucioneve financiare dhe organeve ligjzbatuese. Ky nuk është thjesht një debat politik. Ky është një debat që prek ekonominë e vendit, të ardhmen e të rinjve dhe mundësinë që qytetarët shqiptarë të jetojnë me dinjitet në vendin e tyre.
May 15, 2026