Plugo të vërtetën’/ Meta akuza Ramës: 479 milionë euro falje për CEZ-in po fshihen pas çështjes DIA
Presidenti i Partisë së Lirisë, Ilir Meta ka dalë me akuza të forta ndaj Edi Rama, duke e cilësuar çështjen DIA si një “zhurmë” për të mbuluar atë që ai e quan falje prej 479 milionë eurosh ndaj kompanisë CEZ. Në një mesazh publik drejtuar Flavio Qarri, Meta kërkon hetim më të thelluar dhe transparencë për këtë çështje.
Në postimin e tij në Facebook, Meta ngre pikëpyetje konkrete mbi rolin e institucioneve, duke përmendur kallëzimin e Kontrollit të Lartë të Shtetit dhe mungesën e veprimeve hetimore, ndërsa sfidon median dhe publikun të “plugohet” mbi zhvillimet reale të dosjes. Sipas Metës, shumë elementë të rëndësishëm janë lënë në hije.
Në të njëjtën kohë, Meta insiston se kompania DIA ka qenë një strukturë me pronësi dhe ndikim amerikan, duke iu referuar edhe deklarimeve të Tedi Blushi dhe dokumenteve të publikuara, të cilat sipas tij rrëzojnë akuzat dhe hedhin dritë mbi origjinën e marrëveshjeve me CEZ.
Postimi i plotë:
Një sqarim shtesë për yllin e mëngjesit, Flavio Qarri
I dashur Flavio,
Dua të të sqaroj edhe njëherë se DIA, ishte dhe mbetet, zhurma e Edi Ramës për të fshehur faljen e 479 milion eurove CEZ-it.
Meqënëse ti i ke futur edhe PLUG-un korrupsionit, kur të kesh kohë, plugo pak se ç’bëhet me padinë zyrtare të Kontrollit të Lartë të Shtetit (institucion kushtetues), në Prokurori, për faljen e 479 milion eurove?
Plugo pak, a është thirrur një herë të vetme, në cilësinë e kallëzuesit, drejtuesi i KLSH-së?
Plugo pak, a po hetohet kjo çështje apo është mbyllur?
Plugo pak, cili ka qene apo vazhdon të jetë prokurori i çështjes?
Plugo sepse besoj se do të gjesh shumë fakte interesante.
I dashur Flavio,
Nën dritën e fakteve dhe provave ligjore që kemi publikuar, tani e di i madh dhe i vogël, se kallëzimi ndaj meje është bërë me urdhër të Edi Ramës nga një kallëzues, punonjës i shtetit në OSHEE dhe ish-drejtor i Kastriot Ismailaj.
Ky kallëzues, kurrë nuk e kishte përmendur emrin e Ilir Metës, përveçse në tetor 2017, kur u detyrua me “masa shtrënguese” të bënte një kallëzim të rreme duke ju referuar të tretëve, si Elvis Mataj, i cili nga ana e tij, para prokurorisë, nën betim, i ka mohuar të gjitha deklarimet e kallëzuesit.
Arsyeja pse kallëzuesi u detyrua të bëjë kallëzim, do të sqarohet në vijim, por edhe ti besoj e di, që Edi Rama i ka pikë të dobët personat që kanë halle me drejtësinë.
Kompania DIA, i dashur Flavio, ishte që para se të lindte dhe derisa u mbyll, një krijesë amerikane dhe këtë e sqaroi shumë qartë edhe Sekretari i Përgjithshëm i Partisë së Lirisë, Z. Tedi Blushi, i cili bëri publike vetëm 8 nga të paktën 800 fakte, dokumenta, shkresa dhe dëshmi që e provojnë.
👉 𝐒𝐡𝐢𝐡: https://ëëë.facebook.com/share/v/18QqonPYs3/
Por ndër to unë po të rikujtoj, dokumentin zyrtar shtetëror të regjistrimit të DIA-s në Republikën e Shqipërisë, ekstraktin e marrë nga Qendra Kombëtare e Biznesit, ku provohet de jure, se kush ishte pronari i kompanisë.
Akti i shkarkimit si administrator të Z. Kastriot Ismailaj provon se pronari i vërtetë i DIA-s, ishte Znj. Rebecca Gaskin.
Këtë fakt e përforcojnë edhe dokumentat e Arbitrazhit, siç provohet edhe nga komunikimet zyrtare mes Z. Elvis Mataj dhe drejtuesit të lartë çek të CEZ-it, Z. Josef Hejsek, ku vërtetohet se Znj. Rebecca Gaskin ishte jo vetëm NR.1 i DIA-Dega Shqipëri por edhe një nga tre aksioneret amerikane të kompanisë mëmë Debt Advisory International LLC.
DIA mëmë është ajo që Z. Hejsek, në dëshminë e tij të dhënë nën betim para prokurorit, më 20 dhjetor 2011, thote se referencat nga DIA e Uashingtonit na bindën që të lidhnim kontraten midis CEZ-it dhe DIA-s.
Dëshminë e Z. Hejsek, që e kemi publikuar, prokurorët e dorëzuan në seancën paraprake vetëm pas insistimit tonë, pasi dilte e gjithë e vërteta se lidhjen midis DIA-s dhe CEZ-it e bënë vetë amerikanët.
Kur është bërë marrëveshja CEZ-DIA, ka qenë dikush tjetër dhe jo unë, ministër i Ekonomisë, për të cilin dëshmitari Z. Elvis Mataj ka thënë se i ishte premtuar ryshfet dhe pagesë.
Të lutem edhe njëherë kur të kesh kohë shihe edhe njëherë konferencën e Z. Blushi dhe plugo për faljen e 479 milion eurove CEZ-it nga Edi Rama!
