Gëzim Saliu
Paketa e re, rimbursim brenda 30 ditëve për eksportuesit, kreditim i TVSH-së së karburantit
Rama: Rrisim me 80% eksportet për 3 vjet, ndërhyrje në Kodin Doganor për firot dhe mbetjet
Pas katër muajsh nga diskutimet me palët e interesuara, qeveria prezantoi dje paketën e veçantë për industrinë fasone, ku parashikohen 46 masa të reja me qëllim krijimin e një modelit të ri ekonomik si edhe rritjen e punësimit. Por pavarësisht nga masat lehtësuese, në paketën e re u vu re se ashtu si në atë të miratuar në dhjetor, biznesi fason do të vazhdojë të paguajë tatimfitimin në nivelin 15%, edhe pse më parë ishte premtuar ulja e tij për këtë kategori. Sipas Kryeministrit Rama, rritja prej 5% që iu bë tatimfitimit do të konsiderohet si kontribut i industrisë për veten, ku përfituesit do të jenë ato industri që do të sjellin rezultate në aspektin e punësimit si edhe një plani konkret të zhvillimit. “Kemi pasur një diskutim kur kaluam paketën e re fiskale, lidhur me tatimin mbi fitimin dhe kemi arritur në përfundimin që rritja prej 5% e tatimit të fitimit në industrinë tuaj do të konsiderohet si kontribut për vetveten. Ashtu siç do të merren paratë nga kjo rritje,ashtu do të vihen në dispozicion të industrisë me një proces që do të jetë tërësisht i hapur dhe transparent. E këto para do të shkojnë për të gjithë ato kompani që do të paraqesin plane konkrete zgjerimi, zhvillimi, dhe rritje të punësimit”, – tha kreu i qeverisë.
Paketa
Për Kryeministrin Rama dhe qeverinë që ai drejton, paketë e re do të bëjë të mundur që për tri vite të numri i të punësuarve të deklaruar të rritet nga 28 mijë në 100 mijë. Po ashtu, sipas qeverisë, paketa do të synojë rritjen me 80% të eksporteve për tri vitet e ardhshme si edhe rritjen me 5 milionë dollarë të Fondit të Punësimit. “Objektivi është të hapen 12-15 mijë vende pune. Në vitin e dytë të shkojë në 60 mijë dhe në vitin e tretë të shkojë në 100 mijë vende pune”. Ndërkaq, kreu i mazhorancës listoi disa nga masat e reja të ndërmarra në paketën për industrinë fasone, duke nënvizuar së pari akordimin e kontratës me vlerën vetëm një euro në vit për impiantet e përpunimit aktiv, një masë që sipas tij do t’i kursejë industrisë një shumë të konsiderueshme. “Po ashtu rimbursimin brenda 30 ditëve për eksportuesit, të TVSH-së dhe 60 ditë për të gjithë të tjerët, duke u garantuar përmes kësaj pakete atë që është kërkuar me insistim nga ju dhe kam kënaqësinë t’ua them si një arritje të përbashkët; që gjithë kjo industri të kalojë në riskun zero dhe për këtë arsye edhe gjithë procedura doganore të kalojë nga një procedurë që ka shkuar në 3, 4, 5 ditë nga një herë edhe një javë në një procedurë që do të zgjasë vetëm 4-5 orë”, – tha ai. Një tjetër masë e marrë në paketë ishte edhe ajo për kreditimin e menjëhershëm të TVSH-së së karburantit pa pasur nevojë për të dorëzuar dokumente apo pa marrë miratimin e Drejtorisë Rajonale Tatimore si edhe përfshirja e kompanive fason në zonat e lira industriale si kompani të industrisë së përpunimit aktiv. “Në të njëjtën kohë do të ndërtojmë edhe një “show room” për prodhuesit shqiptarë fasonë, gjë kjo e sugjeruar edhe prej jush. Ndërkohë AIDA po përfundon projektin për hapjen e 3 shkollave profesionale në 3 qytete për industrinë fasone”, – theksoi Rama. Ndërkohë kërkesës së përfaqësuesve të kësaj industrie për ndërhyrje në Kodin Doganor lidhur me mbetjet apo firot, kreu i qeveris iu përgjigj duke pohuar: “Do të bëjmë një ndërhyrje të menjëhershme ne kodin ekzistues për të trajtuar ekskluzivisht për industrinë tuaj çështjen e mbetjeve dhe të firove. Kështu që në momentin që do të ndërhymë në Kod dhe kemi mundësi ta bëjmë këtë, ju do të përfitoni menjëherë një trajtim krejt tjetër të mbetjeve dhe të firove”.
Paketa e fasonëve, disa nga masat bazë
-Rimbursim brenda 30 ditëve për eksportuesit me risk zero
-Kreditim i menjëhershëm i TVSH-së për karburantet
-Kontratë me vlerë një euro në vit për impiantet e përpunimit aktiv
-Rritja prej 5% e tatimit të fitimit tek fasonët do të konsiderohet si kontribut për vetveten-(paratë do të shkojnë për kompanitë që do të paraqesin plane konkrete zhvillimi dhe rritje të punësimit)
-Përfshirja e kompanive fason në zonat e lira industriale
-Ndërtimin e një “show room”-i për prodhuesit shqiptarë fasonë
-Hapjen e 3 shkollave profesionale në 3 qytete për industrinë fasone
-Listë e makinerive të përjashtuara nga TVSH-ja
-Deklarimi i punonjësve do të bëhet online, duke shkurtuar kohën e kësaj procedure në 10 ditë
-Trajtimi i i posaçëm për fasonët për mënyrën e kontrolleve duke bërë një dallim mes punonjësve që merren për tu trajnuar dhe punonjësve që pastaj merren si punonjës përfundimtarë
-Kurse profesionale të drejtuara nga praktika në punë
5 mijë vende pune te panairi i 1 majit/ “Fasonët”, Veliaj: 1 vit sigurime shoqërore, plus 4 rroga për çdo punëtor të ri
Ministri i Mirëqenies Sociale dhe Rinisë, Erion Veliaj, prezantoi dje lehtësirat për biznesit fason nëpërmjet paketës së re, ku tha se ajo mbështetet në tri shtylla kryesore: në targetimin e varfërisë, uljen e kostove për ndustrinë (nxitjen e punësimit), dhe rritjen e produktivitetit të punës. Sipas ministrit, paketa gërsheton ndihmën ekonomike me fondin e punësimit, ku theksoi Veliaj, fondi i nxitjes së punësimit, i cili këtë vit është trefishuar, ka disa risi. “Bizneset mund të aplikojnë online, vlerësimi do të bëhen sipas një sistemi transparent me pikë, janë ulur tarifat e miratimit të fondit nga 30 ditë në 10 ditë, e gjithashtu bizneset që punësojnë më shumë do t’u incentivohet sigurimet shoqërore e shëndetësore. Subvencioni për një person të punësuar do të jetë një vit sigurime shoqërore dhe shëndetësore të paguara, plus katër rroga mujore”, – deklaroi ministri. Nga ana tjetër, Veliaj foli edhe lidhur me panairin e punësimit më 1 maj, ku do të afishohen rreth 5 mijë vende pune. “Në datë 1 maj në pallatin e Kongreseve do të hapin konkursin për të filluar aplikimet në fondin e nxitjes së punësimit dhe për të shpërndarë këto 2.7 milionë dollarë. Do të jenë 5 mijë vende pune në panair. Pas përfundimit të buxhetit prej 2.7 milionë dollarë ne parashikojmë një fond prej 5 milionë dollarë, ekskluzivisht për biznesin fason. Është një mënyrë për të kthyer taksën mbi tatimin e fitimit”, – deklaroi ai.
