Një sagë qesharake’/ Spahia: Padi e motivuar politikisht nga PS, qëllimi është dëmtimi i demokratëve në zgjedhje
Ish-kryetari i Bashkisë Shkodër dhe kandidati i PD-së për deputet në këtë qark, Bardh Spahia, e cilësoi si absurd dhe të motivuar politikisht procesin gjyqësor ndaj tij. Ai tha se padia kundër tij është iniciuar nga Partia Socialiste për të goditur PD-në në prag të zgjedhjeve. Spahia shpjegoi se menjëherë pas marrjes së detyrës, zbuloi se kontrata e drejtorit të ujësjellësit ishte rinovuar në mënyrë të paligjshme.
Pas anulimit të kësaj kontrate, drejtori siguroi një vendim gjyqësor që bllokoi urdhrin e tij, vendim që më pas u hodh poshtë nga Gjykata e Apelit. Ish-kryebashkiaku theksoi se procesi është i njëanshëm dhe se po përdoren lidhje të dyshimta për ta penguar. Ai siguroi se çdo veprim është bërë në përputhje me ligjin dhe në interes të qytetarëve. Spahia akuzoi PS-në se po e përdor drejtësinë për ta dëmtuar politikisht në fillim të fushatës. Sipas tij, këto përpjekje nuk do ta ndalin PD-në dhe përkundrazi e motivojnë më shumë. Ai u shpreh i bindur se objektivi final i demokratëve është fitorja në zgjedhjet e 11 majit.
Spahia
Është një situatë absurde, unë e kam thënë që në fillim të nisjes së kësaj sage, sa qesharake aq edhe tendencioze.
kam thënë mendimin tim, që është një padi me sfond krejtësisht të qartë politik, e iniciuar nga zyrat e Partisë Socialiste jo vetëm në Shkodër por edhe në Tiranë, të cilët kanë instruktuar këtë personazh të bëjë një padi ndaj Bardh Spahisë.
Në fakt, historia është krejtësisht e thjeshtë. Menjëherë pas marrjes së detyrës si kryetar bashkie, pak ditë pas hyrjes në zyrë dhe fillimit të punës, i rikthehet nga një fushatë elektorale shumë intensive me popullin dhe qytetarët e Bashkisë së Shkodrës, ku një prej ankesave kryesore dhe problematikave kryesore ishte pikërisht problematikat e mëdha në lidhje me furnizimin me ujë të këtyre qytetarëve. Unë mësoj që kontrata e drejtorit të ujësjellësit ishte rinovuar në mënyrë të paligjshme rreth 2 muaj përpara se t’i skadonte kontrata 3-vjeçare këtij drejtori.
Menjëherë, duke u konsultuar edhe me juristët tanë, bëra revokimin e urdhrit të paraardhësit tim për rinovimin e kësaj kontrate, pra anulimin e kontratës.
Sapo nxora këtë urdhër, personi në fjalë siguron një sigurim padie, arrin të marrë në kohë rekord – çuditërisht – një sigurim padie, pra një bllokim nga ana e Gjykatës së Shkallës së Parë të urdhrit të kryetarit të bashkisë.
Kishte edhe një raport të mëparshëm nga ana e Kontrollit të Lartë të Shtetit, i cili konstatonte shkelje dhe abuzime dhe sugjeronte largimin nga puna të drejtorit të ujësjellësit.
Unë respektova vendimin e gjykatës, e ankimuam në Gjykatën e Apelit, prita sa u shpreh Gjykata e Apelit, e cila e hodhi poshtë atë sigurim padie, pra atë bllokim të urdhrit të kryetarit të bashkisë, dhe ndërmora menjëherë hapat për shkarkimin e zotërisë dhe emërimin e administratorit të ri të ndërmarrjes së ujësjellësit.
Zotëria në fjalë, siç është përmendur edhe në media, nëpërmjet edhe lidhjeve të dyshimta të tij me gjyqtarë të shkarkuar tashmë nga vettingu, siguroi një sigurim padie brenda pak orëve dhe bllokon për herë të dytë urdhrin e kryetarit të bashkisë.
Është për t’u theksuar fakti që të dy këto sigurime padie janë hedhur poshtë nga Gjykata e Apelit, duke u konsideruar si veprime të paligjshme.
Duhet të theksoj që në çdo hap të kësaj sage është zbatuar me korrektesën më të madhe ligji dhe vetëm ligji, dhe është mbrojtur interesi qytetar.
Unë akuzohem për moszbatimin e një vendimi të ndërmjetëm, i cili është faktuar nga ana e Gjykatës së Apelit si i paligjshëm, në një çështje e cila është e mbyllur në themel.
Kjo shpjegohet me faktin që është iniciuar politikisht për të dëmtuar Partinë Demokratike, për të dëmtuar Bardh Spahinë, në fillimin e fushatës elektorale. Është qartazi me sfond politik, por asnjë problem nuk ka për mua, është një betejë që ka vetëm një fund.
Kjo situatë, përkundrazi, më motivon më shumë, ashtu siç më motivon edhe mbështetja e të gjithë qytetarëve të Shkodrës, të cilët e njohin krejtësisht mirë situatën dhe personazhin e përfshirë në këtë diskutim. Por edhe njëherë e them: veçse na motivon edhe më shumë drejt objektivit tonë final, i cili është fitorja e 11 majit.
